ЗУЛФИЯХОНИМНИНГ ОЛИМА ҚИЗЛАРИ

Ўзбекистон Хотин-қизлар қўмитаси ташаббуси билан Зулфия номидаги Давлат мукофоти совриндорларининг республика анжуманига тайёргарлик доирасида мукофот эгалари билан юзма-юз суҳбатлар ўтказилиб, уларнинг фаолияти, ижоди мониторинг қилиб борилмоқда.

Шу мақсадда “Олимпия шон-шуҳрати” музейида спорт йўналишидаги совриндор қизларнинг ютуқлари тақдимотига бағишлаб “Обод юртнинг бахтли қизлари” мавзуида, Ўзбекистон Республикаси Бадиий академиясида тасвирий санъат йўналишида ижод қилаётган совриндорларнинг “Суратларда Ватаним мадҳи” мавзуидаги кўргазмаси, Ўзбекистон Ёзувчилар уюшмасида адабиёт йўналишида Зулфия мукофотига сазовор бўлган қизларнинг “Сени куйлайман, Ватан” мавзуидаги мушоираси босқичма-босқич ўтказилиб келинмоқда. Навбатдаги тадбир эса жорий йилнинг 14-август куни Мустақилликнинг 21 йиллигига бағишлаб фан таълим йўналишидаги ютуқлари учун Зулфия номидаги Давлат мукофотига сазовор бўлган қизларнинг илмий анжумани ва илм-фан тараққиёти йўлида изланиш олиб бораётган совриндорларни тақдирлаш мақсадида ўтказилди.

Зулфия номидаги Давлат мукофоти 1999-йил 10-июньда муҳтарам Юртбошимиз Фармони билан таъсис этилган. Ўтган вақт мобайнида мукофотга сазовор бўлган 182 нафар қизларнинг 24 нафари фан, 38 нафари таълим соҳаларидаги ютуқлари учун ушбу мукофотни қўлга киритганлари ҳам айнан илм-фан йўналишига берилаётган этиборнинг наъмунаси десак асло муболаға бўлмайди.

Шунга асосан бу галги илмий конфересияда бугунги куннинг долзарб мавзуларида, хусусан, тиббиёт, Оролбўйи аҳолисининг саломатлиги, табиий газ ва ёқилғиларни тежаш, ҳуқуқий саводхонликни ошириш, болалар спортни ривожлантириш, интернет журналистикасининг бугунги аҳволи каби илмий мавзудаги маърузалари билан иштирок этдилар.

Тадбирдан кўзланган мақсад илм-фан соҳасида мутахассис ва масъул раҳбарлар билан совриндор қизларнинг учрашувини ташкил этиш ҳамда ёш авлодга тўғри йўл кўрсатиш, устоз-шогирд анъаналари бардавомлигини таъминлашдан иборатдир.