“Йилнинг энг яхши фан ўқитувчиси – 2014”

Оъзбекистон Республикаси Халқ таълими вазирлиги томонидан ҳар йили анъанавий тарзда ўтказиб келинаётган “Йилнинг энг яхши фан ўқитувчиси” Республика кўрик-танлови нафақат ғолибларни аниқлаш, балки илғор фан тажрибаларини таълим тизимига жорий этишда ҳам қўл келмоқда. Мазкур танловнинг бу йилги республика босқичида 196 нафар педагоглар 14 та фан бўйича 4 та турга ўзаро беллашдилар.

Иштирокчиларнинг замонавий ахборот-коммуникация технологияларидан хабардорлиги ва улардан таълим-тарбия жараёнларида самарали фойдаланиш малакасига эътибор қаратилди. Яна бир муҳим жиҳати, танлов қатнашчилари таълим сифатини оширишга оид муаммолар ва уларнинг ечими бўйича ўз таклиф-мулоҳазаларини тақдимот шаклида намойиш этишди.

– Тил билган эл билади, – дейди доно халқимиз. Ҳозирги кунда болаларнинг чет тилларини ўрганишларига яратилаётган имконияларни кўриб хавасим келади, – дейди биз билан суҳбатда Наманган шаҳар 6-ихтисослаштирилган давлат умумтаълим мактаби ўқитувчиси Гулшан Махмудова. – Бугуннинг боласи талабчан, зийрак ва билимли. Уларга билим бериш биз ўқитувчилардан ўз устимизда тинимсиз ишлашни талаб қилади. Мана шундай кўрик-танловлар эса доимий изланишда бўлишимизга ёрдам беради.