Йил қувончлари

Ўзбекистон Республикаси Конституцияси – бахтимиз қомуси! Унда фарзандлик, ота-оналик бурчимиз, мажбуриятларимиз, ҳақ-ҳуқуқла­римиз белгилаб берилган. Булар миллий қадриятларимиз билан уйғун бизга мустақиллик берган неъматдир. Давлатимизнинг кексаларга эътибори, ўғилларимнинг ғамхўрлиги туфайли  Чинобод санаторийсида дам оляпман. “Кексалик фаслларнинг қишидир, унга илиқлик киритиш фарзандлар ишидир”, дейди доно халқимиз. Сиҳатгоҳнинг шифобахш суви,  шифокор ва ҳамшираларнинг биз дам олувчиларга ўз вақтида кўрсатган эътибори ҳамда қилинаётган муолажалар бизга куч-қувват ва шижоат бахш этди.

Зеро, Конституциямизнинг 40-мод­дасида “Ҳар бир инсон ма­лакали тиббий хизматдан фойдаланиш ҳуқуқига эга” деб белгилаб қўйилган.  Бу биз фуқароларнинг саломатлигини асрашда ҳақ-ҳуқуқларимизни муҳофаза қилади.

Ҳаётимдаги энг қувончли кунларимдан яна бири муқаддас Макка-ю Мадинага зиёратга борганим бўлди. Ҳаж сафарига бориш ҳар бир мусулмоннинг эзгу орзуси. Мустақиллик йилларидан бошлаб  бу ма­салага жиддий эътибор берила бошланди. Сафарда юриб “Бир сиқим тупроқ”, “Соғиндим” деб номланган шеърларимни битдим. Ушбу шеърла­рим “Меҳрнома” деб номланган китобимда чоп этилди. Ижодкор сифатида ҳам менга омад кулиб боқди. Бу йил республикамизнинг  мустақиллиги арафасидаги “Энг улуғ, энг азиз” кўрик-танловида ғолиблик бахтига муяссар бўлдим. Бахтли кексалик гаштини сураётганимдан ва ҳаётнинг шундай ширин қувончлари насиб этганидан беҳад шодман.

Ўзбекистон Республикаси ­Президенти томонидан янги 2016-йилни Соғлом она ва бола йили деб номланиши бизни янада хурсанд қилди. Зеро, келажак авлоднинг маънан ҳамда жисмонан соғлом бўлиши она Ватанимиз учун ҳам, оиламиз учун ҳам кўп қувончлар эшигининг очилиши ҳисобланади. Бу йўлда амалга оширилаётган эзгуликлар кўпаяверсин, юртимизнинг янада тараққий этишида камарбаста бўлаётган ҳамюртларимизни кириб келаётган  янги 2016 – Соғлом она ва бола йили билан қутлайман!

Қосимжон ЁҚУБОВ,

Ўзбекистон Республикаси Халқ ўқитувчиси,Тошкент вилояти, Бекобод тумани

– Биз Ўзбекистон спортчилари ўзимизни энг бахтли ёшлар деб айта оламиз. Қўлга киритаётган ютуқларимиз мустақиллигимиз шарофатидир.  Болалигим ариғ-у анҳорлар, дарё-ю кўллар соҳилларида кечган.

Ўша вақтлардан бошлаб спортнинг академик эшкак эшиш турига бўлган меҳрим ортди. Бора-бора мусобақаларда зафар қуча бошладим. Академик эш­как эшиш бўйича ўсмирлар ўртасида Ўзбекистон чемпиони деган шараф­ли номга сазовор бўлдим. Олимпиада ўйинлари, “Умид ниҳоллари”, “Баркамол авлод” каби мусо­бақаларда юқори ютуқларга эришдим. Бу борада жонажон Ватаним менга юксак марраларни забт этишим учун қўш қанот бўлмоқда. Бу Президентимизнинг эътибори ва қўллаб-қувватлаши натижасидир. Ўтган йиллар мобайнида яратилган шароитлардан кенг фойдаланган ҳолда ушбу эътиборга муносиб бўлишга ҳаракат қилдим. Янги йил ҳам омадли келишига и­шонаман. Келаётган Янги йилда сизни юксак зафарлар тарк этмасин. Ўтаётган ҳар бир кунимиз бизга мамнуният тақдим эцин.