ЯНА БИР ЭъТИРОФ

Қадимдан улуғланиб, хушовоз бахшилар томонидан куйланиб келинган халқ достонларида Ватан ишқи, она тупроқ эъзози, эл шижоати, мардлик, соф севги, вафо-садоқат туйғулари мадҳ этилган. Шу боис ҳам улар тилдан-тилга кўчиб асрлар оша янграб келмоқда. “Гўрўғли”, “Алпомиш”, “Ҳасанхон” каби бир қатор достонлар ана шулар сирасига киради.

Ўзбек Миллий академик драма театрида Осиё “Достончилик санъати” Қўмитаси томонидан Жанубий Кореянинг Кванжу шаҳрида бўлиб ўтган эртак, афсона ва эпослар сенарийларининг халқаро танлови ғолиблари “Алпомиш” киносенарийси муаллифларига гран-при совринини тантанали топшириш маросими бўлиб ўтди. Халқ достончилик ижодидаги асрлар оша бизгача етиб келган асл нусхадаги санъат асарларини сақлаш ва замонавий кўринишда талқин қилиб келгуси наслларга етказишни мақсад қилган ушбу халқаро кўрик-танловда ҳамюртларимиз Мастура ва Жасур Исхоқовлар гран-при соҳиби бўлишди. Тадбирда иштирок этган Корея Республикасининг Фавқулодда ва мухтор элчиси жаноб Чо Де Ван халқаро танлов ғолиблари Мастура Исхоқова ҳамда Жасур Исхоқовларни қизғин қутлаб гран-при мукофотини топширди. “Алпомиш” киносенарийсининг бундай юксак мукофотга сазовор бўлиши бой маданий меросимизни халқаро миқёсда яна бир бор тан олинишидир. Энг муҳими Осиё Қўмитаси аъзолари юртимизннинг Бухоро, Хива ва Самарқанд каби қадимий шаҳарларини халқ достончилик ижод маҳсули бўлмиш афсона, эртак ва халқ эпослари яхши сақланган ва дунёга тарқатилган маркази дея эътироф этишди.

Жасур Исхоқовнинг яна бир “Шаҳзода Шерзод саргузаштлари” деб номланган киносенарийси Марказий Осиё ва Корея Республикаси мамлакатлари маданият вазирликларининг “Энг яхши киносенарий” номинацияси бўйича ғолиб деб топилди. Совринни Ўзбекистон Республикаси Маданият ва спорт ишлари вазири Турсунали Қўзиев топширди. Саънат, маданият, театр ва кино намоёндалари ҳамда ОАВ ходимлари иштирок этган тадбир сўнггида “Алпомиш” спектаклидан саҳна кўриниши ва фолклор қўшиқлар дастурлари тақдим этилди.