Ватан ҳимояси – мардлар фарзи

Пойтахтимиздаги Ўзбекистон Республикаси Қуролли Кучлари давлат музейида Қуролли Кучларимизнинг 22 йиллигига бағишланган “Ватан ҳимояси – мардлар фарзи” мавзусида тадбир бўлиб ўтди.

Тадбирда Ўзбекистон Республикаси Мудофаа вазирлиги фахрийлар Марказий кенгаши аъзолари, ҳарбий хизматчилар, Тошкент Олий умумқўшин қўмондонлик билим юрти курсантлари ҳамда Тошкент Ахборот технологиялари университети махсус факултет курсантлари иштирок этди.

Анжуманда сўзга чиққанлар мустақиллик йилларида мамлакатимизда Ватанимиз тинчлиги ва халқимиз осойишталигини таъминлашга қодир, ҳар томонлама ривожланган, замонавий қурол-яроғ ва техникага эга миллий армиямиз шакллантирилганини таъкидладилар. Шунингдек, ҳарбий хизматчиларнинг жисмоний тайёргарлиги ҳамда замонавий ахборот-компютер технология ва интеллектуал билимларни пухта эгаллашларига алоҳида эътибор қаратилаётганлиги тўғрисида сўз юритилди.

Тадбир давомида ҳарбий хизматчилар ва уларнинг оила аъзолари ўртасида ўтказилган “Посбониман муқаддас юртнинг” номли шеърият танлови ғолибларини тақдирлаш маросими ҳам бўлиб ўтди.

– Ватан ҳимоячилари куни нафақат ҳарбийлар, балки бутун халқимизнинг улуғ байрамидир. Чунки дунёда Ватан ҳимоясидан муқаддас, шарафли иш йўқ, – дейди танлов ғолиби, Шимолий-ғарбий округ ҳарбий хизматчиси Дилноза Сулаймонова. – Менинг энг олий мақсадим – Ватанимга садоқат билан хизмат қилиш.