Спорт – соғлом турмуш асоси

Куни кеча пойтахтимизнинг Миробод туманидаги 44-сонли болалар ва ўсмирлар спорт мактабида “Соғлом қизлар – соғлом келажак пойдевори” шиори остида спорт фестивали ўтказилди.

Ўзбекистон Хотин-қизлар қўмитаси, Миробод туман ҳокимлиги ва Миробод туман халқ таълими муассасалари фаолиятини методик таъминлаш ва ташкил этиш бўлими ҳамкорлигида ташкил этилган фестивални ўтказишдан мақсад “Соғлом бола йили” Давлат дастури ижросини таъминлаш, жумладан, маҳаллаларда истиқомат қилаётган ва таълим муассасаларида таҳсил олаётган қизларни спортга янада кенг жалб этиш, уларнинг соғлом ўсиб улғайишида спортнинг аҳамияти, ўрнини ошириш, шунингдек, спорт иншоотларида оилавий спорт билан шуғулланиш учун зарур шарт-шароитларни яратишдан иборатдир.

Тумандаги спорт мактабларида шуғулланаётган қизлардан 6 нафари спорт гимнастикаси, 2 нафари спорт акробатикаси бўйича халқаро мусобақалар совриндорлари эканлиги бу борада олиб борилаётган ишлар самарасидир.

Мазкур фестивалда Миробод туманидаги Болалар ва ўсмирлар спорт мактабларида шуғулланувчи қизлар иштирокида “Биз билан бўлинг” шиори остида маҳорат машқлари ҳам намойиш этилди. Айниқса, тумандаги умумтаълим мактаб ўқувчилари томонидан ташкиллаштирилган “Келажагинг ўз қўлингда” номли театрлаштирилган мусиқий дастур кечанинг янада қизиқарли ўтишига хизмат қилди.