Спорт – шавқим, шиддатим

Ўзбекистон – истеъдодлар макони. Ёшларга мамлакат миқёсида қаратилаётган эътибор эса ана шундай истеъдодларнинг кашф этилишига туртки бўлмоқда. Юртимизда спортга, айниқса, болалар спортига жуда катта эътибор қаратилмоқда. Спортчи ёшларимиз эса ана шундай ғамхўрликка ўзларининг тиришқоқ ва меҳнацеварликлари билан жавоб қайтаришмоқда. Спортнинг қайси йўналишини олиб қараманг унда фахрланишга арзигулик ёш чемпонларимиз талайгина топилади. Улар нафақат спортда, балки ўқишда ҳам тенгдошларига ўрнак бўлиб келишмоқда.

Зиёбек ёшлигидан спортга меҳр қўйди. Айниқса, телевизор орқали шарқ яккакурашларига асосланган филм ёки кўрсатувларни мароқ билан томоша қиларди. Ундаги бу қизиқишни кўрган отаси Ҳусниддин Бекиев 10 ёшли ўғлини Азамат Карим спорт соғломлаштириш марказига олиб борди. Шу кундан бошлаб Зиёбек спортнинг шотокан карате-до тури билан шуғуллана бошлади. У ерда таниқли мураббий ВИИ дан қора белбоғ соҳиби Хўжамқул Хўжақулов унга каратенинг сир-асрорларини ўргата бошлади. Зиёбекдаги интилиш ва меҳнацеварлик ўз самарасини бера бошлади.

Тез орада клуб миқёсида ўтказилган мусобақада иккинчи ўринни қўлга киритиб, меҳнатлари бежиз кетмаётганини устозларига кўрсатди.

Ўтган йили, айниқса, ёш спортчимиз учун омадли келди. Азамат Карим спорт соғломлаштириш мажмуаси миқёсида ўтказилган мусобақада 10 – 13 ёшгача бўлган спортчилар ўртасида шотокан карате-донинг кумите ва ката йўналишларида 2-ўринни эгаллади.

Жорий йилда Азамат Карим спорт соғломлаштириш маркази томонидан 1-июнь – Халқаро болаларни ҳимоя қилиш куни муносабати билан ўтказилган мусобақада кумите ва ката йўналишларида яна бир бора ўзини намоён этиб, олтин медал билан тақдирланди.

Бундан ташқари Зиёбек ўндан ортиқ диплом ва медаллар соҳиби. У ҳозирги кунда пойтахтимиздаги 226-мактабда таҳсил олади. Спорт ва ўқишни бир хил олиб бораётган йигитчанинг ўқишлари ҳам тенгдошларига ўрнак бўлгулик. Зеро у, мактабда ҳам энг илғор ўқувчилардан ҳисобланади. Шу боис рус тили бўйича мактаб миқёсида “Энг аълочи ўқувчи” номинациясида фахрий ёрлиқ билан тақдирланди. Зиёбек биргина мактабдаги дарслар билан чегараланиб қолмайди. Бўш вақтларида турли тўгаракларга қатнашади. Инглиз тили ва расм чизиш унинг энг ёқтирган машғулотларидир.