Шоирлар – болаларга

Илёс МУСЛИМ

Бефаҳм эсон

Карам чопиғига тушганда Эсон,

Ҳеч ерда қолмайди экиндан нишон.

Киришди нўш пиёз, сабзи ўтоққа,

Ёввойи ўтдир, деб юлди у паққа.

Атиргул очилсин, деб шошиб-пишиб,

Ғунчасин қўл билан очди энгашиб.

Ишкомда узумни тез юлиб олди,

Еб кўрса ғўр экан, уялиб қолди...

---

Шукур САъДУЛЛА

Митти

Митти деган мушугим,

Ўтакетган олғир, шум.

Митти пойлаб туради.

Сичқонвойни кўради.

Сичқон мушукни кўриб,

Қочар тешикка уриб.

Сичқон қочиб қутулар,

Мушук эса тутилар.

Тойчоқ

Тойчоғим бор – учқур от,

Қуралай кўз – тулпор зот.

Эгар-жабдуқ ураман,

Миниб, олға сураман.

Ўзи ёғоч, ёли қил,

Овунчоғим, олға ел!

---

Анвар ОБИДЖОН

Турп

Менга теккан чоғ оғзинг,

Тиниқ бўлар овозинг.

Сўнг очилар иштаҳанг,

Бўп кетмасанг бас, наҳанг.

Пўстим осмон рангида,

Қишнинг совуқ тонгидан –

Шимираман ёруғлик...

Ўзим – олтиариқлик.

Калиш афсонаси

Сени кийиб олишиб,

Роса кезиб юришди.

Йўлакдаги хасларни

Дангал эзиб юришди.

Калишвой.

Писанд қилмай қарардинг

Эҳ, ўзингдан пастларга...

Охир сени ёқишди

Қўшиб ўша хасларга,

Калишвой.

---

Ҳабиб РАҲМАТ

Булоқ

Турна кўзли булоқча

Қайнаб ётар биқирлаб.