РАҚАМЛАР ОЛАМИГА САЁҲАТ

Ёзув тахтасига сана ёзилади. Ўқитувчи болалардан сўрайди:

– Болалар биз нечанчи йилга қадам қўйдик. Болалар жўр бўлиб:

– 2016-йилга, – дея жавоб беришади.

– 2016-йил Президентимиз томонидан қандай номланди?

– Соғлом она ва бола йили.

Математика фан ойлигида ташкил этилган махсус дарс шу тарзда бошланди. Дарсни олиб бориш услуби ўзгача тарзда ўтказилди. Болалар уч гуруҳга бўлиндилар: “Мустақиллик”, “Тинчлик” ҳамда “Озодлик”. Гуруҳлар стол атрофида айлана усулида жойлашиб олиб ўз гуруҳларига таъриф бердилар. Сўнгра хаёлан “Афросиёб” поездида саёҳатга чиқишади. Устоз ўқувчиларга ушбу поезд ҳақида маълумот бериб ўтди.

Болалар биргаликда илк бекат – Самарқанд шаҳрига келишди. Слайд орқали болаларга Самарқанднинг қадимий обидалари кўрсатиб ўтилади. Бу болаларнинг тасаввурини бойитади. Регистон майдонида “Сирли сандиқ”ни қўлга киритган ўқувчилар сандиқ ичидан олган мисолларни ёзишади. 650 ва 450 сонларининг айирмасини 33 марта орттириб ёзиш, 260 ва 140 сонларининг йиғиндисини 2 марта камайтириб ёзиш, 670 ва 230 сонларининг йиғиндисини 9 марта камайтириб ёзиш ўқувчилари учун жиддий мисол бўлди. Аммо уддабурон гуруҳ болалари ҳеч қийналмай бунинг уддасидан чиқишди. Математик топшириқни тўғри бажара олган гуруҳ навбатдаги бекатга йўл олади. Манзил Жиззах шаҳри. Бу бекат “Эпчиллар” бекати бўлиб, унда ўтилган мавзуни мустаҳкамлаш учун тестдан фойдаланилади. Гуруҳларга тест материаллар тарқатилди. Вақт белгиланди. Билимли ўқувчилар навбатдаги шартни ҳам аъло бажардилар ва “Истиқлол” нишони билан тақдирландилар. Ўқувчилар машғулотларни тўғри бажариб бориш давомида шаҳримиз бўйлаб “Афросиёб” поездида саёҳат уюштиришди. Бу бекатларда ўқувчилар қўшиш ва айириш амалларига доир мисол ва масалаларни ҳам ечишди. Гуруҳларга учтадан мисол берилди. Жавоблар “Чархпалак” методидан фойдаланиб текширилди. Вақт тугагач ўқувчилар жавоб варақларига ўзининг исми ва гуруҳ номини ёздилар. Жавоблар бошқа гуруҳлар билан чархпалак усулида алмаштирилди. Экранда тўғри жавоблар берилди. Синфдошлари ечган мисолларни жавоблар билан таққослаб балл қўйдилар. Кейин бирма-бир қўйган балларини изоҳлаб бердилар. Бу эса ўқитувчи томонидан назорат қилинди. Шу тариқа ўқувчилар бу бекатда ҳам “Истиқлол” нишонига эришишгач кейинги бекатлар Тошкент шаҳри “Топқирлар бекати” сўнгра бешинчи бекат “Зукколар” бекатига саёҳат уюштиришди. Ушбу бекатларда топишмоқлар ва бошқа бошқотирмалар орқали ўқувчилар синовдан ўтказилди. Ғолиблар ҳар доимгидек “Истиқлол” нишони билан тақдирланишди.

Дарс сўнггида фаол қатнашган ўқувчилар, гуруҳларда йиғилган нишонлар ҳисобланди. Ғолиб гуруҳ аниқланиб, гуруҳлар ўртасидаги билимлар рейтинг усулида баҳоланади. Фаол қатнашган ўқувчиларнинг ота-оналарига ташаккурномалар берилади. Мазкур очиқ дарс давомида болалар математика фанида олган билимларини мустаҳкамлаб бориш билан бирга юртимиз тарихига оид билимларни эгаллаб Ватанпарварлик руҳида камол топишига хизмат қилади.