ҚОРХАТ

Воқеий ҳикоя

Усмонжон синфининг “номдор” тўполончиларидан. Ўқиши ҳам ҳаминқадар. Зўрға уч баҳога илинади. Устозларидан “дакки” эшитавериб, “қулоғи қотиб қолган”. Онасининг “Дарсингни тайёрладингми ўғлим”, деган сўзларига билинар-билинмас бош ирғайди-ю кўчага югуради.

Эртасига эса мактабга келиб, уй вазифасини бажармагани учун қизариб ўтиради. Дарсга кечикмай келишини ҳисобга олмаганда мақтагулик жиҳати йўқ. Унинг гоҳо деразадаги гулларнинг япроғини узиб олиши, ёки кийим илиш учун синфга қўйилган шкафни бир тепиб очиши, шкаф тортмасига қўйилган уй иши дафтарларининг орасидан ўзиникини қидириб, ҳар гал уни аралаштириб ташлаши-ю дарс тугаши билан доскага “ажи-бужи” расмларни чизиб кетишини айтмаса яхши болалар сафига қўшиш мумкин эди. Аммо...

Бўралаб ёғаётган оппоқ қор зумда ер бағрини қоплаб олди. Киши этини жунжиктирар даражада эсаётган изғирин у ён-бу ён қорларни учириб тепалик ҳосил қилишга киришган. Одатдагидек ҳаммадан биринчи бўлиб синфга кириб келадиган Усмонжон бу гал ҳам одатини канда қилмай совқотган қўлларини “куф-куф”лаганича бир-бирига ишқалаб партасига бориб ўтирди. Бироз ўзига келиб олгач қалин палтосини ва телпагини ечиб синф бурчагидаги шкафни бир тепиб очди-да ундаги илгичлардан бирига кийгизиб қийшайтириб осиб қўйди. Қайтиб жойига ўтирар экан сумкасини парта тагига қўйиш мақсадида пастга эгилиб кўзи тўрт бурчак қилиб букланган оппоқ вараққа тушди. Олиб қараса юзига катта-катта ҳарфлар билан ҚОРХАТ деган сўз ёзилган экан. Қизиқ, буни ким қўйган экан-а, – деган ҳайрат билан ичини очиб апил-тапил ўқишга тушди. “Дарсга ўз вақтида етиб келадиган одобли Усмонжонга синф қизлари номидан қорхат”. Усмонжон шу сўзларни овоз чиқариб ўқир экан ич-ичидан ғурурланиб қўйди ва хатнинг давомини ўқишга киришди.

Сизга биринчи қор муборак бўлсин дея қуйидаги топшириқларни бажаришингизни илтимос қиламиз:

– Шкафнинг иккинчи табақасини қўл билан секин очиб ичидаги дафтарларни алфавит бўйича тахланг.

– Хонадаги гулларнинг япроқларини узмасдан, шохларини букмасдан печка ёнидаги челакдан сув солинг.

– Доскани артиб, бўр келтириб қўйинг.

– Парталарнинг чангини артинг.

– Она тили фанидан 3-машқни кўчиринг ҳамда математика фанидан 140-масалани тезда ишлаб, уй вазифасини ҳам тайёрлаб қўйинг.

Шу шартларни бажарсангиз сиз бошчилигингизда синфимиз 5-”Б” синфидан ўзиб кетади”. Хатни ўқиган Усмонжоннинг юраги алланечук ҳапқириб кетди. У ўзи билмаган ҳолда зудлик билан ишга киришди. Ахир шунча топшириқни бир варакайига бажариш осон эмас-да. Дастлаб шкафдан кеча кетар чоғида ўзи тўзғитиб кетган дафтарларни “а” ҳарфидан бошлаб тахлаб чиқди. Сўнгра гулларнинг япроқларини авайлаб, қайирмасдан ҳар бир гултувакка бир текис қилиб ярим чўмичдан сув қуйиб чиқди. Доскадаги кеча ўзи муаллифи бўлган “ажи-бужи” расмларини ўчириб, бўр келтириб қўйгач парталарнинг чангини артишга киришди. Энди навбат уй вазифаларини бажаришга. Усмонжон пешонасидаги “реза-реза” терларни артар экан, тезда уй вазифасини бажаришга киришди. Машқни кўчирди-ю, математика фанидан масала ечишга келганда бироз қийналди. Аммо уни бир амаллаб бажарди. Ахир қизларнинг олдида қайси ўғил бола бошини эгиб ўтиришни хоҳлайди, дейсиз.

Бирин-кетин синфга кириб келган қизлар хонадаги саранжом-саришталикдан мамнун бўлишиб бир-бирига маъноли қараб қўйишди. Гапнинг сирасини айтганда ана шу мўжизавий қорхат туфайли синф тўполончилари биттага камайган эди-да.