ҚАҲРАМОН ОНАНИНГ ҚУВОНЧИ ЧЭКСИЗ

Янги йил айёми Хива шаҳридаги “Меҳрибонлик” уйи тарбиячи ва тарбияланувчилари учун қўша-қўша қувончлар олиб келди. Меҳр маскани раҳбари, Ўзбекистон Қаҳрамони Вера Борисовна Пак бу гал нафақат байрам қутловларини, балки келин саломларини ҳам қабул қилиб олди. Бу ерда тарбияланиб, катта ҳаётга йўлланма олган Амирбек, Умарбек, Хушнудбекларнинг ҳаёт йўлдошлари –Султонпошша, Мафтунахон, Дилбархонларинг никоҳ тўйи бўлиб ўтди. Шунингдек, ушбу бахт кечасига меҳр масканида тарбия топаётган ўн уч нафар ўғил-қизнинг мучал тўйлари ҳам никоҳ кечасига, янги йил шодиёналарига уланиб кетди.

Ёшларнинг унутилмас онларини муносиб нишонлаш учун Урганчдаги “Алъбиазим” корхонаси ҳомийлигида тўй дастурхони ёзилди. Чор-атроф байрамона безатилди. Хива тумани ҳокими Д. Аллақулиев бахтли онларнинг соҳибларини самимий муборакбод этиб, эзгу-истаклар билдирди. Устоз педагог, Ўзбекистон Қаҳрамони Анора Маҳмудова янги ҳаётга, бахт остонасига қадам қўяётган келин-куёвларни табриклади. Буюк мамлакатимизга муносиб фарзандлар ва намунали оила бўлишга чорлади.

“Меҳрибонлик” уйи директори, Ўзбекистон Қаҳрамони В.Пак ёшларнинг бошини қовуштириб, савоб ишга бош қўшган меҳри дарё инсонларга, ҳомий ташкилотларга самимий миннатдорлик билдирди.

Онахон давра тўрида ял-ял яшнаб, она юртга, устозларга таъзим қилаётган фарзандларига қарата: – “Ҳаёт йўлларингизда, Сизларга оқ йўл тилайман, азиз ўғилларим, қизларим! Сизларнинг бошингизни силаган, гуллаб-яшнаётган юртимизга гужумдек соя, узумдек мева бергайсизлар!” – деди табрик сўзида кўзларида қувонч ёшлари билан.

Бу барча-барчанинг айни пайтдаги дил изҳорлари бўлди. Беихтиёр мамлакатимиз Президентининг қуйидаги сўзларини эсладик: “Савоб ишни ҳар ким, ҳар куни қилиши керак”. Дарҳақиқат, эзгу ишлар билан бошланган йил қутлуғ келгусидир!