Қадриятларга ҳурмат ёшлар маънавиятини бойитади

Яқинда Маданият ва спорт ишлари вазирлиги томонидан Ўзбекистон Маданият ва санъат кўргазмаси залида “Эркин, ёш авлодлар сенга зўр қанот” мавзусида кўргазма ташкил этилди.

“Соғлом бола йили” Давлат дастури ва Президентимизнинг “Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида”ги қарори ва у асосида ишлаб чиқилган Дастурга мувофиқ ташкил этилган кўргазманинг очилишида музейлар раҳбарлари, ёш ҳунармандлар, рассомлар, Зулфия номидаги Давлат мукофоти соҳибалари, халқаро санъат фестиваллари ва спорт мусобақалари ғолиблари иштирок этди.

Ўзбекистон Республикаси маданият ва спорт ишлари вазири М.Ҳожиматов ва бошқалар Президентимиз раҳнамолигида миллий маданиятимиз ва санъатимизни равнақ топтириш, маънавият масканлари ҳисобланган музейлар фаолиятини қўллаб-қувватлаш, улардаги нодир ашёлар, осори-атиқаларни сақлаш, ўрганиш, мазмун-моҳиятини кенг тарғиб этиш борасида олиб борилаётган ишлар мустақил ва соғлом тафаккурли, юксак маънавиятли авлодни камолга етказишдек эзгу мақсадларга хизмат қилаётганини таъкидлади.

Кўргазмада музейларда сақланаётган бетакрор экспонатлар, фото ва тасвирий санъат намуналари, ёш уста, ҳунарманд ва меъморлар асарлари, каштадўзлик, миниатюра, заргарлик буюмлари кенг намойиш этилди. Шу билан бирга, уста кулол, ҳунарманд ва моҳир рассомлар томонидан маҳорат сабоқлари ўтказилди. Яратилаётган кенг имкониятлардан унумли фойдаланиб, Ватанимизнинг дунёдаги нуфузи янада ортишига муносиб ҳисса қўшаётган иқтидорли, ижодкор ва спортчи ёшлар билан суҳбатлар уюштирилди.