Президентимиз ишончи менга куч бағишлади

Президентимиз Ўзбекистон Республикаси Конституцияси қабул қилинганининг 23 йиллигига бағишланган тантанали маросимда 2016-йилни мамлакатимизда Соғлом она ва бола йили деб эълон қилди ва соғлом авлодни вояга етказиш учун болалар ўртасида жисмоний тарбия ва спортни янада кенг оммалаштириш борасида бир қатор муҳим вазифаларни кун тартибига қўйиш зарурлигини алоҳида қайд этди.

Ҳар бир ўғил-қиз спортга қадам қўяр экан, чемпион бўлиш, жаҳон спорт ареналарида Ватанимиз шарафини ҳимоя қи­лиш орзуси билан яшайди. Унинг иқтидорию маҳорати ўз вақтида қўллаб-қувватланса, спорт билан мунтазам шуғулланиши учун шароит ва имкониятлар яратилса, ҳаракатлари ҳеч қачон зое кетмайди.

Шу маънода, биз – Ўзбекис­тон спортчилари ўзимизни энг бахтли ёшлар, деб баралла айта оламиз. Юртбошимиз раҳнамолигида жисмоний тарбия ва спортни ривожлантириш, ёш авлоднинг ҳар томонлама баркамол бўлиб вояга етишини таъминлашга улкан ғамхўрлик кўрсатил­моқда.

Замонавий спорт мажмуаларида спорт билан шуғулланишимиз учун барча имкониятлар яратилган. Бунга ўз истеъдод ва салоҳиятимизни, жаҳон майдонларида ҳеч кимдан кам эмаслигимиз ва ҳеч қачон кам бўлмаслигимизни намо­ён этишимиз билан жавоб қайта­ришимиз зарур.

Биз, ёшларнинг қўлга киритаётган ютуқларимиз мустақиллигимиз шарофати, Президентимизнинг меҳр-эътибори, ҳар томонлама қўллаб-қувватлаши туфайлидир.

Отам болалигида спортга қизиққан. Аммо у пайтларда спорт билан шуғулланишга бугунгидай шароит бўлмаганидан орзуси ушалмай қолиб кетган. Шу боис отам биз фарзандларини спорт сексияларига етаклаб борган. Оилада уч ўғилмиз. Акаларим ҳам спорт билан шуғулланади.

Ўн ёшимдан бокс билан шуғуллана бошладим. Фарғона бокс мактаби мамлакатимизда етакчилардан ҳисобланади. Бу ердан кўплаб чарм қўлқоп усталари етишиб чиққан. Уларга ҳавас қилиб, кўнглимда “мен ҳам чемпион бўламан!” деган қатъий ишонч пайдо бўлган.

Халқаро майдондаги илк ютуғимга 2012-йили Озарбайжондаги халқаро турнирда эришдим. Шундан сўнг Сербия, Таиланд ва Россияда ўтказилган мусобақаларда совринли ўринларни эгалладим.

2014-йили Таиландда ўтказилган бокс бўйича ўсмирлар ўртасидаги Осиё чемпионатида ва Болгарияда бўлиб ўтган жаҳон чемпионатида олтин медални қўлга киритдим. Наманган вилояти мезбонлик қилган “Баркамол авлод – 2014” спорт ўйинларида ғолиб бўлдим. Бу мусобақалар мени Хитойнинг Нанкин шаҳри мезбонлик қилган ИИ ўсмирлар Олимпиадасига пухта тайёрланишим ва унда ғалаба қозонишимда муҳим аҳамият касб этди.

Бу йилги спорт мавсуми нафақат мен учун, балки бутун терма жамоамиз учун омадли бўлди. Дастлаб Болгарияда ўтказилган анъанавий “Странжа” халқаро турнирида ғалаба қозондим. Таиландда ўтказилган Осиё чемпионатида терма жамоамиз саккизта медални қўлга киритиб, умумжамоа ҳисобида иккинчи ўринни эгаллади. Бунда менинг ҳам ҳиссам борлигидан фахрланаман. Қатарда бўлиб ўтган жаҳон чемпионатида кумуш медалга сазовор бўлиб, ХХХИ ёзги Олимпия ўйинлари­га йўлланмани қўлга киритдим.

Ватанимиз мустақиллигининг 24 йиллиги арафасида Президентимиз фармонига мувофиқ “Шуҳрат” медали билан тақдирланганим камтарона хизматла­рим давлатимиз томонидан юксак баҳоланганидан далолатдир.

Конституция байрами арафасида бўлиб ўтган бир гуруҳ юртдошларимизга Ватанимизнинг юксак мукофотларини топширишга бағишланган тантанали маросимда Президентимиз мени бағрига босиб, “Сен Бразилияда бўладиган Олимпия ўйинларида чемпион бўлишинг керак!” дея юксак ишонч билдиргани менга катта куч-ғайрат бағишлади. Эндиги ниятим Юртбошимизнинг ана шу ишончини оқлаш ва 2016-йилги ёзги Олимпия ўйинларидан Ватанимизга олтин медал билан қайтишдир.