ОВОЗИМДА, СОЗИМДА ВАТАН!

Мамлакатимиз истеъдодлар макони. Юртимизда ёшларга берилаётган юксак эътибор эса ана шу истеъдодларнинг юзага чиқишига замин яратмоқда. Хоҳ спорт хоҳ мусиқа хоҳ илм-фан соҳасида бўлсин дунёнинг манаман деган мамлакатлари вакиллари билан тенгма тенг беллаша оладиган ёшларимиз талайгина. Чеҳрасидан болаларга хос беғуборлик уфуриб турган Шаҳзодбек Абдуқулов ана шундай истеъдодли ёшларимиздан.

Ангрен шаҳридаги 26-умумтаълим мактабининг 8-“а” синфида аъло баҳоларга ўқиш билан бир қаторда Шаҳзод 10- Болалар мусиқа ва санъат мактабидаги халқ чолғулари синфнинг рубоб йўналишида таҳсил олмоқда. Ундаги санъатга, мусиқага бўлган ҳавас мактабга илк қадам қўйган онларидаёқ бошланган десак муболаға бўлмайди. У 1-синфдан бошлаб санъат байрамларига мунтазам қатнашиб келмоқда.

Мактабда мусиқа ўқитувчиси Баҳорой Давлатовадан олган бошланғич мусиқий сабоқлар, устози Абдулла Холиқуловнинг ўгитлари уни мусиқанинг сеҳрли оламига етаклаб, сиру синоатларидан бохабар қилди.

– Шаҳзодбек ёш бўлишига қарамай Ўзбекистон Республикаси Президенти Ислом Каримов ташаббуси билан ўтказилган “Ягонасан, муқаддас Ватан!” республика кўрик-танловининг “Ўзбекнаво” эстрада бирлашмаси тизими Тошкент вилояти босқичида 2-даражали диплом билан тақдирланди. Шаҳзодбек келгусида ўз сози, ўз овозига эга эл суйган хонанда бўлиб етишига ишонамиз, - дейди Тошкент вилояти Халқ ижодиёти ва маданий-маърифий ишлар илмий-методик маркази раҳбари ўринбосари Олим Яҳёев.

Аста-секин зафарлар қуча бошлаган ёш санъаткор энди ўзини мусиқасиз, қўшиқсиз тасаввур қила олмай қолди. У шаҳар миқёсидаги тадбирларда иштирок эта бошлади. Ундаги истеъдодни ўз вақтида пайқаган Ангрен шаҳар А.Навоий номли маданият маркази бадиий раҳбари Рашидхон Қодирхонов Шаҳзодбекни марказ қошидаги “Ёғду” болалар вокал гуруҳига таклиф этди.