ОИЛА МУСТАҲКАМЛИГИ – МАТБУОТ КЎЗГУСИДА

Яқинда Ўзбекистон мустақил босма ОАВ ва ахборот агентликларини қўллаб-қувватлаш ва ривожлантириш жамоат фонди томонидан Журналистларни қайта тайёрлаш халқаро маркази ҳамда Бирлашган Миллатлар Ташкилотининг Болалар жамғармаси – ЮНИСЭФ билан ҳамкорликда “Шодлик-Палас” меҳмонхонасида “Оила институтини мустаҳкамлашнинг долзарб масалаларини ёритишда ОАВнинг роли” мавзуида семинар-тренинг ташкил этилди.

Ушбу семинар-тренинг 2012-2013 йилларда амалга оширилиши режалаштирилган “Ўзбекистон ОАВларининг оила институтини мустаҳкамлаш масалаларини илгари суриш бўйича салоҳиятини ошириш” лойиҳаси доирасида ўтказилмоқда.

Семинарнинг мақсади – босма ОАВ журналистлари ва муҳаррирларининг кенг жамоатчиликка “Мустаҳкам оила йили” Давлат дастурида белгилаб берилган устувор вазифаларни амалга оширишда мамлакатимиздаги фуқаролик институтлари иштироки ҳамда унда жамиятнинг асосий бўғини – оилани давлат томонидан қўллаб-қувватланиши, ривожланиши ва мустаҳкамланишига доир чора-тадбирларни етказишда билим ва кўникмаларини оширишдан иборат.

Тадбир давомида журналистларга Ўзбекистонда бола ҳуқуқларини таъминлаш масалалари устувор аҳамиятга эгалигини эътиборга олиб, ОАВнинг аҳоли ҳуқуқий маданияти ва ҳуқуқий онгини юксалтириш, бола ҳуқуқлари соҳасидаги миллий қонунчилик ва халқаро ҳуқуқ, жумладан, “Бола ҳуқуқлари тўғрисида”ги Конвенсияни ўрганиш борасидаги фаолиятини кучайтиришга қаратилган ҳамда мазкур мавзуда материаллар тайёрлашнинг ўзига хос жиҳатлари, маълумот манбалари билан ишлаш, журналистларнинг ушбу мавзуга доир одоб-ахлоқ меъёрлари бўйича амалий маслаҳатлар берилди.