ОАВ, матбаа ва ноширлик

Халқ тафаккурини юксалтирувчи асосий воситалардан биридир

Мустақиллик йилларида оммавий ахборот воситалари, нашриётлар, матбаа корхоналари фаолиятини янада ривожлантириш, уларни қўллаб-қувватлаш, техник ва технологик жиҳатдан янгилаш, замонавий иш юритиш тартибларини жорий қилиш бўйича изчил ислоҳотлар амалга оширилмоқда.

Ўзбекистон Матбуот ва ахборот агентлиги ташаббуси билан пойтахтимиздаги Миллий матбуот марказида бўлиб ўтган “Оммавий ахборот воситалари, нашриёт ва матбаа фаолиятини қўллаб-қувватлаш ва ривожлантириш жараёнлари” мавзусидаги анжуманда бу борадаги амалий ишлар ҳақида батафсил маълумот берилди.

Тадбир иштирокчилари мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш консепсиясида ахборот соҳасини ислоҳ қилиш, ахборот ва сўз эркинлигини таъминлаш борасида қатор стратегик вазифалар белгилаб берилганини алоҳида таъкидлашди.

Бугунги кунда ахборот соҳасини ислоҳ қилиш, сўз эркинлигини таъминлаш муҳим вазифага айланган, Ўтган йили миллий ва хорижий тажрибалар асосида ёш журналистларнинг малакасини ошириш, журналист ва муҳаррирлар иштирокида аҳолининг сиёсий-ҳуқуқий маданиятини, фуқаролик позициясини кучайтириш, миллий истиқлол ғояларини тарғиб этиш масалалари юзасидан давра суҳбатлари ҳамда 150 дан зиёд бошқа тадбирлар ўтказилди.

Агентлик томонидан ишлаб чиқилган чора-тадбирлар режасига кўра, бу йил республикада юздан зиёд семинарлар, ўқув-тренинглар, ўнта кўрик-танлов ўтказиш режалаштирилган.

Тадбир давомида нашриётлар ва матбаа корхоналари фаолияти ҳақида ҳам сўз юритилди. Қайд этилдики, ўтган йили нашриётлар фаолиятини мувофиқлаштириш, қўллаб-қувватлаш ва такомиллаштириш мақсадида 23-24-май кунлари Қорақалпоғистон Республикаси, Тошкент шаҳри ҳамда вилоятларда “Адабиётга эътибор – келажакка, маънавиятга эътибор” шиори остида Республика “Китоб байрами” ва “Китоб – миллатнинг бебаҳо маданий ва маънавий мероси” мавзусида илмий-амалий конференсия ўтказилди. Ҳозирги пайтда эса республикада 108 та нашриёт фаолият кўрсатаётган бўлиб, улар томонидан ҳар йили 2 минг номдан зиёд, умумий адади 40 миллион нусхадан ортиқ китоблар нашр этилмоқда. Шунингдек, жорий йилда юртимиздаги истироҳат боғларида ҳам китоб дўконлари қуриш режалаштирилган.