Навоийда китоблар кўргазмаси

Навоий шаҳрида “Адабиётга эътибор – келажакка эътибор” шиори остида китоблар кўргазмаси ташкил этилди.

“Ўзбеккитобсавдо” аксиядорлик компанияси, Республика Маънавият тарғибот маркази вилоят бўлими ва вилоят ахборот-кутубхона маркази ҳамкорлигида ташкил этилган кўргазмада 500 номдан ортиқ китоблар намойиш этилмоқда.

– Кўргазма Президентимиз раҳнамолигида миллий маънавиятимизни янада бойитиш, бой маданий меросимизни асраб-авайлаш ва ривожлантиришга қаратилаётган алоҳида эътиборнинг амалдаги ифодаси бўлди, – дейди вилоят ахборот-кутубхона маркази директори Рамазон Ражабов. – 20 апрельга қадар давом этадиган кўргазма доирасида китоблар савдоси ҳам ўтказилаётир. Жойлардаги ахборот-ресурс марказлари китоб фондини бойитишда бундай кўргазмаларнинг аҳамияти катта.

– Кўргазмага икки фарзандим билан бирга келдик, – дейди Замира Раҳимова. – Улар ўзлари қизиққан илмий ва бадиий адабиётлардан харид қилишди. Бундай кўргазмалар, айниқса, ёшларда китобхонлик маданиятини юксалтиришга хизмат қилади.