МЎЙҚАЛАМ ВА ЖАЖЖИ МУСАВВИР

– Мен расм чизишга жуда қизиқаман, – дей­ди 22-сонли умумтаълим мактабининг 3-синф ўқувчиси Лолахон Юсупова. – Шу боис мактабдаги ўқишимдан кейин Хоразм вилоят “Баркамол авлод” болалар марказидаги “Ёш мусаввир” тўгарагига қатнашаман. Бу ердаги педагоглар жамоаси биз ўқувчиларга мусаввирлик санъати сирларини ўргатади. Тасвирий санъат турлари билан таништирадилар.

Тўгарагимиз раҳбари Моҳинур Қурёзова бизга ўз орзуларимизни қоғозда акс эттиришга чин дилдан кўмаклашадилар. Хато ва камчиликларимизни меҳр билан тушунтириб, муваффақиятларимизни ол­қишлайдилар. Яқинда юртимиз мустақиллик байрами олдидан Тошкент шаҳридаги “Баркамол авлод” республика болалар бадиий ижодиёт марказида бўлиб ўтган “Ёш қаламкаш” Республика кўрик-танловида Мустақиллик байрамининг 24 йиллигига бағишлаб чизган расмим билан иштирок этиб 2-ўринни қўлга киритдим. Бунинг учун аввало устозимга раҳмат айтаман.

“Баркамол авлод” республика болалар бадиий ижодиёт маркази томонидан ташкиллаштирилган мазкур танловнинг ҳуду­дий босқичларида икки мингдан зиёд истеъдодли ўғил-қиз қатнашди. Танловнинг республика босқичида ўттиз нафардан ортиқ ёш ижодкорнинг юздан зиёд асари на­мойиш қилинди. Улар орасида хоразмлик Лолахон Юсупованинг ҳам борлиги ва у­нинг муваффақияти яқинларига, устозлари­га байрам совғаси бўлди.

Лолахон Юсупова ижодий ишларида ўз Ватанига бўлган меҳр-муҳаббатини оиласи билан биргаликда акс эттира олган. “Тинч юртда – фаровон оила” деб номлаган ижод маҳсулида жажжи қалбнинг юрт тинчлиги учун шукронаси яққол кўриниб турибди. Лолахоннинг она тимсолида яратган образида она меҳр-муҳаббати, акс эттирилган. Шунингдек, унинг манзарали иши – она табиатни, кун ботишининг ўзгача жилвакорлигини маҳорат ила акс эттирганини кўриб, қалбингиз фахр ва ғурурга тўлади. Келажаги ёруғ, ижодга тўла беғубор юрак эгаси Лолахонга “балли-эй қизим, сенга доим омад ёр бўлсин!”, дегинг ­келади.