МЭНИ КУТАР ПОРЛОҚ КЭЛАЖАК

Бу нурафшон ҳаётда ўз келажаги ҳақида ўйлаб, уни истиқболли бўлишини ният қилган инсонлар жуда кўп. Аммо бунга жиддий ёндашмай, вақт деб аталмиш бебаҳо неъматнинг қадрини чуқур англаб етавермайдиганлар ҳам йўқ эмас. Фарзанднинг иқтидори ва қобилиятини эрта англаб уни шакллантиришда ота-оналарининг ўрни ниҳоятда катта. Бунда уларнинг кўмаги муҳимдир.

Мавлуда опа ва Ойбек ака Акромовлар ҳам тўнғич фарзанди Дилзоданинг болалигидан тикиш-бичишга иқтидори борлигини пайқашди. Ҳали мактаб ёшига етмаган қизалоқ ўз қўғирчоқларига ажойиб, бежирим либослар тика бошлаганидан, хонадон катталарининг кўзи қувнайди. Мато ранглари бир-бирига ҳамоҳанг танланган. Кўйлакчаларга бежирим тикилган кичик-кичик гулчалар ҳам кишини бефарқ қолдирмайди. Шу сабаб Мавлуда опа қизини тикиш тўгарагига бириктириб қўйди. Кейинчалик, Дилзода ўз малакасини ошириш мақсадида Шайхонтоҳур туманида жойлашган “Баркамол авлод” маркази қошида очилган “Либос дизайнерлик” тўгарагига қатнай бошлади. Тиришқоқ қиз Нодира Очилова, Севара Абдусатторова, Содиқ Шофайзиев каби устозларидан дизайнерлик соҳасининг сир-асрорларини қунт билан ўргана бошлади. Шу билан биргаликда у турли танлов ва кўргазмаларда иштирок этиб, ўз малака ва иқтидорини намойиш этди. Яқинларининг кўмаги билан ёш дизайнер ҳар йили ўтказилаётган “Болажонлар – ширинтойлар” номли болалар мода фестивалида ўзининг “Бойсун чечаклари”, деб номланган ўндан ортиқ коллексиясини тақдим этди. Коллексиянинг “Бойсун чечаклари” дея номлашига сабаб Сурхондарё вилоятининг ўзига хос ёрқин ва бетакрор кашталари қизалоқни ҳайратлантирган бўлса, ажаб эмас.

Либослар асосан икки ёшдан саккиз ёшгача бўлган болажонлар учун мўлжалланган. Ундаги танланган ранглар, кашталар, либослар бичими етук дизайнерлар эътиборига сазовор бўлди.

Республикамизда фаолият юритаётган иқтидорли дизайнерлар иштирок этган модалар намойишида 9-синф қизнинг иштироки эътирофга молик, албатта. Бу тадбир унинг учун катта маҳорат мактабига айланди.

– Биз ёшларга яратилган имкониятлар туфайли ўз иқтидоримизни намойиш қилиш имконига эгамиз. Келажакда дизайнерлик соҳасини мукамммал эгаллаб, миллий либосларимиз ҳамда каштамизни дунёга танитишни орзу қиламан, – дейди Дилзода Акромова

Инсон ўз устида тинимсиз ишлаши, танлаган касбини дилдан севиши лозим. Мақсад сари интилиш чоғида учраган барча қийинчиликларнинг мукофоти албатта бўлади. Бунинг учун вақтини бехуда ўтказмасдан, муваффақият сари олға интилмоқ лозим. Зеро, бугунги қилинган ҳаракат келажагимизни нурафшон бўлишига замин бўлади.