МАДИНАНИНГ ОППОҚ ОРЗУЛАРИ

Мадина Саъдуллаева эндигина 10 ёшга тўляпти. Пойтахтдаги 182-мактабнинг 4- синфида аъло баҳоларга ўқийди. Шу билан бирга мактаб тўгаракларига фаол қатнашади. Гимнастика, рассомлик, бисер тикиш тўгаракларининг машғулотларига ўзгача қизиқиш билан иштирок этади. Унинг рассомлик тўгарагида устози Латифа Асомиддиновадан ўрганган йигирма бешдан ортиқ чизган суратларини кўздан кечириб катта таассурот олдик.

У кўнглидан ўтказган нарсани чизишни хуш кўради. Латифа опаси ҳам шунга ўргатган. Табиатдан, кўрган манзараларидан олган таассуротларини кўнглидан ўтказиб акс эттириш табиийликка ўргатади деб ҳисоблайди устози.

Мадина чизган суратларига ўзи ном қўйишни ёқтиради. “Оққушим, оппоқ қушим”, “Минг рангда товланар товусим”, “Хон балиқ- балиқлар султони”, “Қуёшли осмон”, “Айиқполвоним”, “Тойчоғим”, “Ўрдагим”, “Қорбобо” каби сувратлари эътиборни тортади.

Турли хил гулларни чизиш борасида ҳам туркум суратлари бор. Шунингдек, “Клеопатра” ва “Ўзбек қизлари” деб номланган суратлари ҳам кишини ўзига жалб этади. Портретлар ичида айниқса, “Нигоҳ” деб номланган сурати эътиборимни тортди. Унда аёлнинг назари, нигоҳи гуллар орасида акс эттирилган. Аёлларнинг нигоҳи гулдек нозик бўлиши керак деяптими?! Ёки аёллар нигоҳи ҳамиша гулларга тушса, юртда эзгуликлар кўп бўлади деяптими?!. Ҳар ҳолда унда ўзига хос нималардир бор. “Аёл нигоҳида-тинчлик” деб номлаган бўлардим. Ҳар ҳолда суратдаги фалсафий фикр мушоҳадага ундайди. Кичкинтой рассомнинг ютуғи ҳам шунда. Энг асосийси расм чизаётган боланинг, ёки турли тўгаракларга қатнашаётган ўқувчининг фикр доираси, тасаввурлари кенгаяди. Ижодкорлиги юксалади. Келажакда қайси касбни эгалламасин ижодкорлик, изланиш унга ҳамроҳ бўлади, — дейди мактаб директори Сайёра Абдураҳмонова.