КИТОБ ЙЎЛИ

Китоб инсон ҳаётида бебаҳо ўринга эга эканлигини такрорлашга ҳожат йўқ. Шу боис ҳам дунёнинг кўпгина мамлакатларида китобга бағишланган кўргазмалар, тадбирлар, йиғилишлар мунтазам ўтказилиб келинаётир. Ана шундай тадбирлардан бири шу йил 24-26 сентябрь кунлари Туркманистон Республикаси пойтахти Ашхобод шаҳрида бўлиб ўтган "Китоб-ҳамкорлик ва тараққиёт йўли" ИХ Халқаро кўргазма ярмаркасидир. Бу кўргазма аллақачон анъанага айланган бўлиб, дунёнинг қатор нуфузли давлатлари қатнашиб келмоқда.

Бизнинг Халқаро кўргазмага борадиган йўлимиз китоб ва китоб мухлислари билан бевосита боғлиқ бўлади. Ғ.Ғулом номидаги маданият ва истироҳат боғида илк бор ўтказилган "Болалар китоби" республика фестивалининг очилишида иштирок этиб, унинг иккинчи кунида йўлга тушдик. Бизга боғда намойиш этилаётган юзлаб китоблар гўё "Оқ йўл" тилаб қолгандек эди...

Ашхободга Урганч, сўнг Тошҳовуз орқали бордик. Тошҳовузда яна бир китоб байрамининг устидан чиқдик. Ўша кунлари бу шаҳарда бир миллион китоб фондига эга бўлган Тошҳовуз вилоят кутубхонаси очилди.

Ашҳобод ИХ Халқаро китоб кўргазма-ярмаркаси 24– сентябрьда кўргазмалар Мар-казида тантанали очилди. Бу галги кўргазмада дунёнинг ўттиздан ортиқ мамлакатларидан келган ноширлар, матбаачилар ва ижодкорлар қатнашдилар. Жумладан, АҚШ, Англия, Австрия, Германия, Россия, Туркия, Хитой, Жанубий Корея, Ҳиндистон, Эрон, Полша, Саудия Арабистони, Руминия, Албания, Белоруссия, Украина, Қозоғистон, Тожикистон, Арманистон, Озарбайжон, Молдова мамлакатлари билан бирга Ўзбекистон ноширлари ҳам кўргазмада фаол иштирок этдилар. Бизга ажратилган павилонда нашриётларимизда чоп этилган 200 дан ортиқ номдаги китоблар ва албомлар намойиш этилди. Ва айтиш мумкинки, Ўзбекистон Республикаси павилони китобхонлар, олимлар, ижодкорлар, ноширлар ва журналистлар билан доимо гавжум бўлди.

Улар биздан мустақил Ўзбекистон эришаётган ютуқлар ва ўзгаришлар ҳақида катта қизиқиш билан сўрадилар, шунингдек, Ойбек. Одил Ёқубов, Пиримқул Қодиров, Ўлмас Умарбеков, Эркин Воҳидов, Абдулла Орипов, Ўткир Ҳошимов сингари машҳур ижодкорлар ҳаёти ва ижоди ҳамда уларнинг асарлари билан кўпроқ қизиқдилар.

Халқаро кўргазма ярмарка якунида "Ўзбекистон" нашриёт-матбаа ижодий уйи томонидан чоп этилган "Ўзбекистон-мева-сабзавотчилиги ҳамда узумчилигининг салоҳияти ва истиқболлари", деб номланган албом кўргазманинг нуфузли ҳайъати томонидан ИИИ-ўрин билан тақдирланди. Шунингдек, "Ўқитувчи" нашриёт-матбаа ижодий уйи кўргазманинг махсус дипломига сазовор бўлди. Бу ўзбек ноширлари фаолиятини хорижда эътироф этилиши ва эришган катта ютуқларидан биридир.

Бу йил 290 йиллиги кенг нишонланаётган машҳур туркман шоири Махтумқулининг кўплаб тилларга таржима қилинган китоблари кўргазманинг нуфузини янада оширди. Айниқса, Жанубий Корея ноширлари чоп этган "Махтумқули, танланган шеърлар" китоби ҳажми, безатилиши билан кўпчилик кўргазма қатнашчиларини ҳайратга солди.