Карате ва футбол

Элёра Пармонова иккисида ҳам бирдек муваффақият қозонмоқда

Ҳаёт ҳамиша тасодифларга бой. Жажжигина қўлларини узатиб, дадасининг бўйнига осилиб эркаланаётган қизалоқни улғайиб, мактабни тугатмасданоқ Осиё чемпионатида кумуш медални қўлга киритишини ким ҳам хаёлига келтирибди, дейсиз.

Мактаб остонасига қадам қўйган Элёра Пармонова синфдошлари орасида интилувчанлиги ва зукколиги билан ажралиб турарди. Бунга сабаб, унинг оила аъзолари спортни қадрлар, фарзандларининг соғлом бўлишида унинг ўрни беқиёслигини дилдан англар эди. Айниқса, онажони Озода Фозилова Элёранинг соғлом ҳолда вояга етиб келажакда спорт мураббийи бўлишини орзу қиларди.

– Акам олти ёшидан бошлаб, спортнинг карате тури билан шуғулланади. Бир куни “Элёра, юр, сени бир жойга олиб бораман”, – деди қўлларимдан тутиб. Акам билан йўлга чиқдик. Каратечилар шуғулланадиган залга етиб борганимизда, нақ эллик нафарга яқин ўғил боланинг барчаси менга ҳайрон бўлиб қаради. Лекин мураббий мени илиқ қарши олди, – дейди Элёра биз билан суҳбатлашар экан. – Ўша куни мураббий мени синовдан ўтказди. Шу кундан бошлаб, каратега меҳрим ошди. Энди Нодир акамдан ҳам олдинроқ, машғулотларга шошаман. Бир йил деганда туман, вилоят мусобақаларида муваффақият қозона бошладим. Беш йил республика миқёсида ўтказилган “Қувноқ стартлар” мусобақасида жамоа сардори бўлиб иштирок этдим. Қашқадарё вилоятининг Ғузор тумани терма жамоасига қабул қилиндим. Талабчан мураббийим Шерали Чориевдан мактабни тугатгунча олган маҳорат дарсларим зое кетмади. Энг катта ютуғим Осиё чемпионатида қўлга киритган кумуш медалим бўлди.

Мактабни тугатганимдан сўнг карате билан шуғулланишга имконим бўлмади, аммо спорт оламидан узоққа бора олмаслигимни англадим. Омадим келиб, Тошкент давлат жисмоний тарбия институтининг талабаси бўлдим. Эндиликда каратечи қиз эмас, балки футболчи қиз бўлишга интилиб, устозларимдан сабоқ олмоқдаман. Ўқиш билан биргаликда мураббийлик фаолиятимни ҳам бошлаганман.

Элёра Пармонова айни пайтда Тошкент шаҳрининг Мирзо Улуғбек туманидаги 49-мактабда жисмоний тарбия фанидан ўқувчиларга сабоқ бермоқда. Мактабга ишга келган кезлари Зарифа Султонова, Санобар Жалолова каби тажрибали ўқитувчилардан устозлик касбининг сир-асрорларини ўрганишга интилиб, уларнинг қўллаб-қувватлашидан мамнун бўлган эди. Бугун улар билан бир жамоада меҳнат қилиб, обрў-эътибор қозонган спорцевар қиз яна янги марралар сари интилмоқда.