Жасорат дарслари

Ёшларда ватанпарварлик ғояларини шакллантиради

Жорий йилнинг 13-14 январь кунлари республикамиздаги барча умумтаълим мактабларида

“Жасорат дарслари” бўлиб ўтди.

Таълим муассасаларида ҳуқуқий ойликнинг мантиқий давоми сифатида фахрий ҳарбийлар, ёзувчи ва шоирлар, таниқли санъаткорлар иштирокида “Жасорат дарслари” ўтказилди. Мазкур дарс соатларида Ватан ҳимояси барчанинг Конституциявий бурчи экани, унинг тинчлиги ва осойишталигини таъминлаш шу юртда истиқомат қилувчи ҳар бир фуқаро учун шараф эканлиги тарғиб қилинди. Умумтаълим мактабларида “Ватан ҳимоячилари куни”га бағишланган шиор ва плакатлар, мамлакатимиз мудофаа салоҳиятини мустаҳкамлаш борасида амалга оширилаётган ишларни ўзида акс эттирган бурчаклар ташкил этилди.

Шунингдек, таълим муассасаларида 2013-йилнинг 15-декабрьидан жорий йилнинг 14-январьигача “Ҳарбий ватанпарварлик” ойлиги деб эълон қилиниб, ойлик доирасида оммавий ватанпарварлик тадбирлари ташкил этилди.

Хусусан, айни пайтда доимий фаолият кўрсатувчи 140 нафар тарғиботчи томонидан таълим муассасаларида “Армия – мустақиллигимиз ва эркинлигимиз кафолати”, “Армияда хизмат шарафлидир”, “Миллий армиямиз – ғуруримиз” каби мавзуларда давра суҳбатлари ва учрашувлар ташкил этилмоқда.

Бундан ташқари, республикамиздаги мавжуд 298 та болалар мусиқа ва санъат мактабларидаги ижодий гуруҳлар ўртасида “Мардлар қўриқлайди Ватанни!” шиори остида ҳарбий-ватанпарварлик руҳидаги қўшиқлар танлови бўлиб ўтмоқда. Жорий йилнинг 13-14 январь кунлари ушбу танловнинг Қорақалпоғистон Республикаси, Тошкент шаҳар ва вилоятлар босқичлари ўтказилди.