Изланишлар самараси – муваффақият

Мусиқа инсон кечинмаларининг гўзал сайқалидир. Унда ҳамиша кўнгилнинг энг инжа туйғулари ўз аксини топади. Санъат ва мусиқани қалбан англаган, уни севган инсон ҳамиша гўзалликка интилиб яшайди. Мутахассисларнинг фикрича, мусиқа бола тарбияси борасида ўзига хос ўринга эга экан. Унда оҳангларни фарқлаш орқали зеҳн, тафаккур ва дид сайқалланиб боради.

Қизалоғи Камилада мусиқага, айниқса, пианинога бўлган қизиқишини ангалаган хонадон катталари уни Р.Глиер номидаги Республика ихтисослаштирилган мусиқа академик лицейида сабоқ олишини маъқул кўришди.

Камила Султановада мусиқани ўзгача муҳаббат билан севиш ва тушуниш иқтидорини кўрган устози Рахмет Полвонов қизалоққа ҳам устоз, ҳам отадек меҳр ва қатъият билан пианинонинг барча сир-асрорларини имкон қадар ўргатиб борди.

Меҳнатнинг меваси рағбатда кўринади, деганларидек устоз ва шогирд биргаликдаги машаққатли изланишлари жорий йилнинг 25-29 март кунлари Россиянинг Суздал шаҳрида анъанавий тарзда ўтказилиб кели­наётган "Олтин ҳалқа" номли халқаро танловда Ўзбекистон Халқ таълими вазирлиги тасарруфидаги таълим муассасаларининг иқтидорли ўқувчи ва ўқитувчилари қаторида Камила Султанова ҳам муносиб иштирок этди.

Ёш бўлишига қарамай, Камила Султанова мазкур танловда ­Д.Омонуллаеванинг "Бибихоним мақбарасида", И.Гайдннинг "Бе­шинчи со­натаси", И. Стравинскийнинг "Учинчи этюди" асарларини маҳорат билан ижро этиб олий соврин – гран-прига сазовор бўлди.

– Яратилган имкониятлар муваффақиятлар эшигини очади. Ана шу муваффақиятлар меҳнат ва машаққациз бўлмайди. Бу мукофот Ватанимга, халқимга, устозларимга, ота-онамга бўлган эътирофдир, – дейди Камила ўз таассуротлари билан ўртоқлашганида.

Ватанимиз болалари иқтидорли, интилувчандир. Ўтказилган мазкур танловда бу яна бир бор ўз исботини топди. Сабаби, Камила билан биргаликда фортопиано йўналишида ҳамюртларимиз Шаҳриёр Шам­сутдинов, эстрада-вокал йўна­ли­шида Хуршид Халиловлар ҳам иштирок этишиб, ИИИ-ўринга муносиб деб топилдилар.