ИСТИҚЛОЛ БЭРГАН ИҚБОЛ

– Биз бахтли ёшлармиз! Негаки, талабалик давримиз Истиқлол йилларига тўғри келди. Ўтган йигирма бир йил давомида мамлакатимизда турли соҳаларда оламшумул ютуқлар қўлга киритилди. Қай бир вилоят ёки шаҳарда бўлманг меҳнаткаш қурувчилар шижоатидан янада сайқалланиб қалбимизга ўзгача шукуҳ бахш этаётган осмонўпар уй-жой, мактаб, лицей, коллеж, олий ўқув даргоҳлари, ранг-баранг гуллару, кўркам боғу роғлар юртимиз чиройига янада гўзаллик бахш этаётганидан завқланасиз. Ана шундай меҳнацевар, самимий инсонлари бор юрт келажаги учун муносиб бўлишга интиласиз.

Мен ҳозирги кунда Урганч давлат университетининг “Амалий санъат” факултети 4-босқич талабасиман. Болалигимдан расм чизишни ёқтирар эдим. Ўқиш жараёнида факултетимиз декани Эркин Рўзиев ташаббуси билан университетда “Амалий санъат” ва “Тасвирий санъат” бўйича талаба-ёшлар ўртасида “Табиатни асрайлик” кўрик-танлови ўтказилганида бу қизиқишларим менга қўл келди. Бизнинг 101-гуруҳ аъзоларининг ижодий ишлари кўрик-танлов ҳайъати томонидан 1-ўринга лойиқ деб топилган эди. Бунда мен “Манзара”, “Натюрморт” йўналишидаги ижодий ишларим билан иштирок этдим ва Халқаро ЮНЭСКО ташкилоти томонидан мукофотландим. Кейинги кўрик-танловларда “Сувни асрайлик”, “Инсон ҳуқуқлари” мавзусидаги расмларим билан қатнашиб, ана шу ташкилотнинг “Фаол иштирокчи” сертификатини қўлга киритдим.