ИНТИЛИШ

---

Шеърият гўзалликка ташна қалбларнинг чанқоғини қондирувчи булоқ сингаридир. Унда инсоннинг орзу-умидлари, дил туғёнлари акс этади. Юртимизда шеърият соҳасида иқтидорли ёшлар бисёр.

Гулруҳ Неъматова ҳам ана шундай ёшлардан бири. У 2009-йил туманлараро ўтказилган “Янги авлод” болалар ижодий фестивалида “Назм” йўналиши бўйича ғолибликни қўлга киритди. Тинимсиз изланишда бўлган Гулруҳ “Келажак овози” республика кўрик-танловида ҳам туман босқичи ғолибаси бўлди. Иқтисодий билим асослари фанидан чуқур таълим олиб, фан бўйича бўлиб ўтган олимпиадада шаҳар босқичида 2-даражали диплом билан тақдирланган иқтидорли қиз Жаҳон иқтисодиёти ва дипломатия университети қошидаги Шайхонтоҳур академик лицейига имтиёзли равишда ўқишга қабул қилинди. Ҳозирги кунда Гулруҳ ушбу лицейнинг “Ижтимоий-гуманитар фанлар” йўналиши бўйича 2-босқич талабаси. У хорижий тилларга қизиқади. Рус, инглиз, немис тилларини пухта ўзлаштиришга интилмоқда. Унинг келажакдаги орзуси етук таржимон бўлиб, юртимиз равнақига ўз ҳиссасини қўшишдир.

Гулзода МАМАТҚУЛОВА,

С. СИРОЖИДДИНОВ номидаги Ўзбекистон Миллий университети қошидаги академик лицей 3-босқич ўқувчиси

---

ЖОНАЖОН ВАТАНИМ!

Мен сенинг дилбандингман, эй улуғ Ватан!

Бағрингда камол топдим муқаддас диёр.

Фарзандларинг қалбида содиқлик ҳисси,

Нон-тузингни оқламоқ аҳди дилга ёр.

Яйраяпмиз гул тўла бўстонларингда,

Бизга имконлар бисёр, келажак порлоқ.

Алп йигитлар мадҳи бор достонларингда.

Улуғим, буюгимсан, фахрим Ватаним!