Инглиз тили билимдонлари

Абдулла Авлоний номидаги халқ таълими ходимларини қайта тайёрлаш ва малакасини ошириш марказий институтида умумтаълим мактаби ўқувчилари ўртасида “Инглиз тили билимдонлари” интеллектуал мусобақасинининг якуний республика босқичи бўлиб ўтди.

Танловда Қорақалпоғистон Республикаси, Тошкент шаҳри ҳамда вилоятлардан сараланиб, ўз ҳудудида ғолибликни қўлга киритган беш нафардан иштирокчи қатнашди.

Мусобақа уч турдан иборат бўлиб, ўқувчиларнинг ёши, чет тилидан билим даражаси эътиборга олинган. Биринчи шарт бўйича 5-, 6-синф ўқувчилари тест саволларига жавоб беришган бўлса, 7-9-синф ўқувчилари танланган мавзу бўйича ижодий ёзма иш топширишди.

Иккинчи тур оғзаки савол-жавоб тарзида ўтди. 5-синф ўқувчилари географияга оид билимларини инглиз тилида ифодалашган бўлса, 6-синфдаги ака-опалари муайян расмнинг мазмунини чет тилида сўзлаб берди. 7-синф ўқувчилари тарихга доир билимларини, 8-синф ўқувчилари инглиз тилидаги аудиоматнни тинглаб тушуниш ва гапириш маҳоратини намоён этган бўлса, битирувчи синф ўқувчилари эса видеотасвирни диққат билан кузатиб, саволларга жавоб беришди.

Охирги шартда саҳна кўриниши бўлиб, бунда ўқувчилардан жамоавий уюшқоқлик, ўзаро тушуниш, инглиз тилида яхши сўзлаша олиш билан бирга, драматик маҳорат ҳам талаб этилди.

Якуний натижаларга кўра, Тошкент шаҳри жамоаси биринчи ўринни эгаллади. Фарғоналик ўқувчилар иккинчи, Бухоро вилояти жамоаси учинчи ўринни банд этди. Қолган вилоят ўқувчилари ҳам махсус диплом ва совғалар билан рағбатлантирилди.