Ҳар нарсада меъёр яхши

Бугун биз техника асрида яшаяпмиз. Бирорта ишимизни техника воситаларсиз амалга оширолмаймиз. Сўзлашишда ҳам, ёзишда ҳам, ҳаттоки, уйдаги юмишларни бажаришда ҳам ҳар биримиз техника воситаларига мурожаат қиламиз. Ўзаро мулоқотга телефонлар, ўқиш-ёзишда компютерлар, уй юмушларида чанг ютгич, кир ювиш машиналари, микро тўлқинли печлар, узоғимизни яқин қиладиган машиналар – барча-барчаси бизнинг биринчи ёрдамчиларимиз ҳисобланди.

Айни пайтда улар инсон онгининг маҳсули, юқори сивилизация белгиси ҳамдир. Улар фаолиятимизнинг янада тезлашишига, масалаларнинг тезкорлик билан ҳал этилишига, вақтни тежашга олиб келмоқдаки, бу ўз навбатида ривожланиш жараёнини яна ҳам тезлаштирмоқда. Жумладан, мобил алоқа воситалари ёрдамида йўлда, кўча-куйда, ҳатто уйда ҳам иш-ўқишга оид масалаларни йўл-йўлакай ҳал қилиб кетиш мумкин.

Ҳақиқатдан ҳам, мобил алоқа воситаси вақтни юқори даражада тежаш имконини беради. Шунинг учун уйда ҳам, кўчада ҳам, ўқишда ҳам, ўз хизмат вазифасини бажариш чоғида ҳам мобил телефонлар каттаю кичикнинг ёнида, қўлда, бўйнида, чўнтагида, ҳамёнида. Кейинги вақтларда чиройли, функсиялари кўп, қимматбаҳо телефон аппратурасини тутиш ёшлар, болалар орасида шу даражада кенг одат бўлиб бормоқдаки, кўп ҳолларда болалар ота-оналаридан бошқа ўртоқларидаги каби имкониятлари кўп бўлган қимматбаҳо телефонлар сотиб олиб беришларини сўраб туриб оладилар. Қайд этиш жоизки, ўқув адабиётларда телефонларнинг зарарли томонлари ҳам борлиги, хусусан, уяли телефонларни меъёридан ортиқча ишлатилиш инсон соғлиғига ниҳоятда зарарлиги, айниқса, болалар ва ўсмир ёшларининг мобил телефонларда узоқ вақт тўхтовсиз гаплашишлари уларнинг соғлиғига жиддий таъсир этиши ҳақида маълумот берилган.

Шунингдек, телефонга берилиб кетиш охир-оқибат атрофга нисбатан ўта лоқайдликни келтириб чиқармоқ-даки, кўп ҳоллларда тенгдошлари-мизнинг транспорт воситасида телефон билан бандлиги оқибатида ёнида турган ёши катта йўловчилар болали аёлларни кўрмай қолаётганликлари, ёки ўзаро суҳбатларини сирларини барчага эшиттириб, гапириб кетаётганликларини гувоҳи ҳам бўламиз. Баъзан қулоғига телефон ёки “наушник” тутиб олиб, орқасида келаётган транспорт воситаларининг сигналларини ҳам эшитмай, катта кўчани кесиб ўтиб кетаётган йигит-қизларини ҳам учратиб қоламиз.