Ҳар кунимиз Наврўз бўлсин!

Ўзбекистон давлат консерваториясида Ўзбекистон Республикаси Маданият ва спорт ишлари, Халқ таълими вазирликлари, “Соғлом авлод учун” халқаро хайрия фонди ва бошқа қатор ташкилотлар ҳамкорлигида “Наврўз садолари” халқ чолғулари оркестрлари ва кўп овозли ансамблларнинг VII республика фестивали бўлиб ўтди.

Унда мамлакатимизнинг барча ҳудудларидан эллик саккизта жамоа қатнашиб, умумий иштирокчилар сони минг нафардан ошди. Бу йилги фестивалнинг аввалгиларидан фарқи, унда мактабгача таълим муассасалари болалар ансамбллари ҳам иштирок этди.

Фестивал давомида мусиқий чолғулар кўргазмаси ташкил этилди, ансамбл ва оркестрларнинг концерт дастурлари бўлиб ўтди. Болалар фольклори, рақс санъати, болалар ва ўсмирлар хор жамоаларининг ижрочилик маҳорати, чолғу созлар ансамблларининг чиқишлари томошабинларга манзур бўлди.

Танловда турли номинациялар бўйича ғолибларга диплом ҳамда қимматбаҳо совғалар топширилди.

Ўз мухбиримиз

Мирзо Улуғбек номидаги Ўзбекистон Миллий университетида Наврўз байрами уюшқоқлик билан ўтказилди.

Хусусан, география факультетидаги тадбирда “Географ ўлкашунос” тўгараги аъзолари ҳамда ушбу факультетнинг биринчи босқич иқтидорли талабаларининг чиқишлари йиғилганларда катта таассурот қолдирди. Шунингдек, факультетлараро бўлиб ўтган беллашувда география факультети талабаларининг саҳна кўринишлари алоҳида эътирофга сазовор бўлди. Таниқли санъаткорларнинг чиқишлари, талабалар ўртасида ўтказилган спорт мусобақалари ҳам байрамга ўзгача шукуҳ бахш этди.

Дилшода АБДУЛЛАЕВА,

ЎзМУ талабаси

Наврўз умумхалқ байрами муносабати билан Ангрен шаҳридаги 34-сонли ихтисослаштирилган мактаб интернатида “Соғлом авлод учун” халқаро хайрия фонди Ангрен шаҳар таянч маскани билан ҳамкорликда расмлар кўрик-танлови ўтказилди.

– Кўзларида меҳр порлаб турган болаларни кўриб беихтиёр тўлқинланиб кетаман, – дейди “Соғлом авлод учун” халқаро хайрия фонди Ангрен шаҳар таянч маскани директори Сакина Пашакулова. – Негаки, бу ёш мусаввирлар табиатни ўзининг беғубор нигоҳлари билан тасаввур қиладилар.

Ўқувчилар томонидан чизилган расмлар “Соғлом авлод учун” халқаро хайрия фонди Ангрен шаҳар таянч маскани вакиллари томонидан муносиб баҳоланиб, жажжи истеъдод эгаларига фонд томонидан эсдалик совғалари топширилди.