ҒОЛИБ ЎҒЛОН

Ўзбекистон карате федерациясининг машқлар ўтказиладиган залида ёшлар машқ қилишмоқда. Уларнинг ҳаракатлари, ҳар бир машққа ўзгача ёндошиши бир сўз билан айтганда болаларнинг ўзини тутиши кишини ўзига жалб этади.

Биз терма жамоа аъзоси, қора белбоғ соҳиби Раҳимбек Аҳмаджон ўғли билан суҳбатлашдик. Асли хоразмлик бу ўсмир йигит Ўзбекистон терма жамоасига қабул қилингач, пойтахтимиздаги 110-мактабда ўқишни давом эттирди. Айни кунда 1-республика юридик коллежида аъло баҳоларга ўқиш билан бирга севимли машғулотларига ҳам вақт топади.

– Спорт менга куч-қувват бағишлайди. Машқлардан кейин ўзимни янада тетик ҳис қиламан. Билимга интилишим янада ортади. Ниятим келажакда отамдек ҳуқуқшунос бўлиб, ҳаётда ўз ўрнимни топиб яшаш, – дейди ёш спортчи фахр билан.

Раҳимжоннинг ютуқлари эътиборга молик. У тинимсиз меҳнатлари боис кетма-кет муваффақиятларга эриша бошлади. 2008-йил Малайзия пойтахти Куала Лумпурда бўлиб ўтган ўсмирлар ўртасидаги Осиё чемпионатида бронза медалини қўлга киритди. Карате бўйича болалар ва ўсмирлар ўртасидаги Ўзбекистон чемпионатида икки бор биринчи ўринни қўлга киритди. Раҳимбек Аҳмаджон ўғли 2007-йил Болгариянинг Варна шаҳрида бўлиб ўтган 16-болалар жаҳон кубоги мусобақаларида бронза медалини қўлга киритишга муваффақ бўлди. 2010-йил ноябрь ойида бўлиб ўтган карате бўйича ёшлар, ўсмирлар ва катталар ўртасидаги Ўзбекистон кубогида ёш спортчи иккинчи ўринни эгаллади.

Раҳимбек 2011-йили Жанубий Кореяда ўтказилган жаҳон кубоги мусобақаларида, Қозоғистонда бўлиб ўтган Осиё чемпионатида иккинчи ўринни, шунингдек, 2012-йилги Ўзбекистон чемпионатида ҳам иккинчи ўринни эгаллади.

Отасига ўхшашни ният қилиб олдинга интилаётган бу ўсмир йигитнинг орзулари ушалишида яқинларининг ишончи, устозларининг ўгити муҳим ўрин тутмоқда. Бундай ёшлар юртимизнинг келажаги, муҳими улар давлатимиз томонидан яратилган барча шарт-шароитлардан унумли фойдаланишга интилмоқдалар.