ФАРЗАНДИМ чет тилида гапира олишини хоҳлайман

Фарзандимни МТМнинг рус гуруҳига берган эдик. Лекин у тилни ўзлаштиришда қийналяпти. Боламни бу муаммони осон енгиб ўтиши, тилни яхши ўзлаштириши учун нима қилишим керак. Бу борада мутахассислар нима дейди?

Робияхон ТУРДИҚУЛОВА,

Тошкент вилояти

Пойтахтимиздаги “Саломатлик” маркази психологи Шоҳида Жумаева:

– Болани хориж тилидаги мактабларда қийинчиликсиз таҳсил олишлари учун шу нарсага эътибор берингки, болангизни мактабга бир йилдан кам бўлмаган вақт мобайнида тайёрлаб боринг. Имкон қадар устози билан тез-тез боғланиб, фарзандингизнинг ўзлаштириш даражаси қай ҳолда эканлиги билан қизиқинг ва албатта ютуқларини рағбатлантириб боринг, камчиликларини юзига айтманг, акс ҳолда боланинг ўзига бўлган ишончи синиб қолади. Натижада ҳар бир ишни иккиланиб, ўзига ишонмай бажаради. Фарзандингиз билан бошланғич дарсларини дўстона руҳда биргаликда бажаринг. Болангизни шунчаки эшитманг, уни тингланг. Зеро, энг тўғри қарор ва хулоса ана шунда юзага келади.

Тошкент вилояти Зангиота туманига қарашли 65-умумтаълим мактабининг бошланғич синф ўқитувчиси Элнура Рўзметова:

– Рус тилига ихтисослаштирилган мактабнинг бошланғич ўқитувчиси сифатида шуни айтишим мумкинки, сўнгги йилларда ота-оналар фарзандларини чет тилига ихтисослаштирилган мактабларга олиб келиш жараёни оммалашмоқда. Бу яхши, албатта. Янгича муҳитга боланинг мослашиши эса бироз қийин кечиши, табиий. Аммо, ота-оналарнинг эътибори ва ҳаракати туфайли болаларнинг хориж тилини ўзлаштириш, ёки шу тилда олиб борилаётган дарсларни қабул қилиши самарали кечяпти. Тажрибамдан келиб чиқиб айтадиган бўлсам, айрим ота-оналар чет тилини фарзандига ўргатиш учун ўзлари ўрганишади ёки боласи билан биргаликда бараварига дарс қилишади. Бола учун ота-оналар кўмаги ҳамиша руҳий далда бўлади. Менимча, бу энг тўғри йўлдир.