Чуст туманида 12 жуфт келин-куёвнинг никоҳ тўйи нишонланди

Наманган вилояти Чуст туманидаги “Паризод” тантаналар мажмуасида Тўрақўрғон, Поп, Чуст туманларидан 12 жуфт келин-куёвнинг никоҳ тўйи тантанали нишонланди.

“Халқ билан мулоқот ва инсон манфаатлари йили” Давлат дастури ижроси доирасида “Президент эътибори – мурувват тадбирларида” шиори остида ўтказилган тантанада Президентимиз раҳнамолигида инсон манфаатларини ҳимоя қилиш, халқимизнинг турмуш фаровонлигини юксалтириш, айниқса, аҳолининг ижтимоий муҳофазага муҳтож қатламини моддий ва маънавий қўллаб-қувватлашга алоҳида эътибор қаратилаётгани таъкидланди.

Мамлакатимизда ишлаб чиқарилган “Captiva” машиналарида келган келин-куёвларни мажмуа хиёбонида тўпланган давлат ва жамоат ташкилотлари вакиллари, фахрийлар, ёшлар ва оила қураётганларнинг ота-оналари, қавм-қариндошлари карнай-сурнай садолари остида кутиб олди.

– Юртимиз бўйлаб ўтказилаётган бундай тўйлар миллий қадриятларимиз бардавомлигини, халқимизга хос ҳамжиҳатлик, меҳр-оқибат ва бағрикенглик фазилатларини намоён этмоқда, – дейди “Нуроний” жамғармаси вилоят бўлими раиси И.Нажмиддинов. – Меҳр-мурувватдан яралаётган янги оилалар ота-боболармиздан мерос эзгу фазилатларни улуғлаши, аҳил ва тотув оила қуриб, Ватанимизга ва халқимизга муносиб фарзандлар тарбиялашига ишонамиз.

Маҳаллий ҳокимликлар, давлат ва жамоат ташкилотлари кўмагида оила қураётган ёшларга уй-жойларини таъмирлаш, тиббий кўрикдан ўтиш ва никоҳни расмийлаштиришда имтиёзлар берилаётганидан келин-куёвлар ва уларнинг яқинлари ғоят мамнун.

– Ўғлим Суннатилла отадан етим қолганида 12 ёшда эди, – дейди чустлик Р.Тўхтаева. – Тақдир экан, 4 болани ўзим катта қилдим. Қийналган вақтларимда қариндош-уруғ, маҳалла-кўй ёрдам берди. Бугун Президентимизнинг ғамхўрлигидан, вилоятимиз раҳбарлари, саховатли ҳомийларнинг меҳр-мурувватидан баҳраманд бўлиб турибмиз. Биринчи ўғлимнинг тўйи бундай катта тантана билан ўтишини орзу ҳам қилмагандим. Давлатимиз раҳбаридан, ҳукуматимиздан, бу хайрли ишга бош қўшган барча саховатли инсонлардан бир умр миннатдорман.