Бойликнинг боши соғлиқ

Кексаларимиз дуога қўл очаркан, соғлик-саломатлик, хотиржамлик абадий бўлишини яратгандан сўрашади. Дарҳақиқат, сотиб олиб бўлмайдиган энг улуғ бойлик ҳам аслида шудир. Буни бошидан турли хасталикларни ўтказган, ҳаловати ўрнини аянчли оғриқлар эгаллаган одам билади.

Олти ой юролмадим. Бир кун тўшакдан турмай ётишнинг азобини тасаввур қилиб кўринг. Қандай оғир-а! Кўнглимга чироқ ёқса ёришмас, эртанги куним қандай бўлишини билмасдим. Ҳис қилганим оғриқ, англаганим тирик эканим эди. Худодан оёқларимга куч ато этишини сўрардим. Умидли дунё, деганларича бор экан. Жонкуяр шифокорларнинг саъй-ҳаракати, туганмас меҳри туфайли яшашга, эртанги кунимга ишонч уйғонди. Ёлғизлик комидан қутулиш бахтига мушарраф бўлдим. Дўстларимни кўргим, остона ҳатлаб кўчага чиққим, табиат гўзалликларидан баҳра олгим келарди. Яратганга шукрки, орзуларим рўёбга чиқди. Аста-секин юра бошладим. Ярим йилдан бери кутилган қадамларим мактаб томон бошлади. Дўстларим, устозларим дийдоридан баҳра олдим. Агар шифокорлар бўлмаганида мен қадам босолмас эдим. Уларга қандай миннатдорчилик билдиришни билмайман. Улар ўз боласидек менга меҳр кўрсатишди. Яшашга умид уйғотишди. Шундай зотлар сабаб кўпчиликнинг уйида хотиржамлик ҳукмрон. Кишиларнинг руҳи тетик. Юртимизда тиббий ҳизмат сифатини ана шундай юқори савияда бўлишига ҳисса қўшган мутасадди инсонларга раҳмат айтаман. Илоҳим ҳеч ким дардманд бўлмасин!