БОЛАЛАР СПОРТИ ИСТИҚБОЛЛАРИ

Юртбошимизнинг “Ҳеч бир соҳа мамлакатни спортчалик тез дунёга машҳур қила олмайди” деган ибораси бежиз эмас. Дарҳақиқат, спорт ҳар қайси мамлакат, ҳар қайси давлатни оламга танитадиган беқиёс воситадир.

Халқаро майдонларда спортчиларимиз эришаётган ютуқлар қалбимизда ғурур-ифтихор туйғуларини уйғотади. Она Ватанимизга муҳаббат ҳиссини янада юксалтиради. Мамлакатимизда болалар спортини ривожлантиришга қаратилган аниқ мақсадли ишлар натижасида ўғил-қизлар мунтазам шуғулланадиган спорт турларининг сони ортиб бормоқда. 6 ёшдан 15 ёшгача бўлган болалар 2005-йилда 43 турдаги машғулотларга қатнаган бўлса, бугунги кунда улар 59 та спорт тури билан шуғулланмоқда.

Бугунги кунда фаолият олиб бораётган спорт мактаблари нафақат соғлом авлодни шакллантиришда, балки кўплаб мусобақаларда Ватанимиз номини бутун дунёга танитишга ҳисса қўшаётган чемпионларни етиштириштириб бермоқда.

Пойтахтимизнинг Учтепа туманидаги 40-сонли Болалар ва ўсмирлар спорт мактабида таълим олаётган ёш спортчилар ҳам халқаро ва республика миқёсида ўтказилган мусобақаларда фахрли ўринларни қўлга киритиб келишмоқда. Мазкур муассасада 405 нафар ўғил-қиз турли спорт турлари бўйича таҳсил олади. Муассасада ўқувчиларнинг таълим-тарбияси, ўз маҳоратларини намоён қилишлари учун барча шарт-шароит яратилган.

Спорт мактабида ўқувчи ёшларга ўз касбининг моҳир ўқитувчилари таълим бериб келишмоқда. 2015-йилда республика миқёсидаги мусобақаларда 43 нафар ўқувчи қатнашиб ғолибликни қўлга киритишида ҳам айнан устозларнинг хизматлари катта. Ёшлар ўртасида комбат айкидо спорт тури бўйича Ўзбекистон Республикаси кубогида Жамшид Ҳидоятов 1-ўрин совриндори бўлса, академик эшкак эшиш бўйича Республика кубогида Шамсиддин Ўлмасов, Абдулазиз Турсуналиев, Умид Тошпўлатов каби бир қанча ўқувчилар фахрли 2-ўринни қўлга киритишди. Таълим даргоҳида таҳсил олаётган ўқувчи-ёшлар нафақат республика, балки халқаро мусобақаларда ҳам совриндорлар сафидан ўрин олмоқда. Хусусан, байдарка ва каноеда эшкак эшиш бўйича ўтказилган ХВИИ ёзги Осиё ўйинларида Эрнест Ирназаров мамлакатимиз шарафини ҳимоя қилиб, 2-ўринни қўлга киритди.

Ўқув даргоҳида барча спорт турлари қатори, футболга ҳам алоҳида эътибор қаратилади. Бунинг яққол исботини Бухоро шаҳридаги футбол бўйича ўтказилган халқаро турнирда 2000–2001-йилда туғилган муассаса ўқувчилари 3-ўринни қўлга киритишгани билан изоҳлаш мумкин. Бундан ташқари, комбат айкидо бўйича ёшлар ва катталар ўртасида Ўзбекистон кубогида ёш спортчилар муносиб иштирок этиб, жами 15та медални қўлга киритди.

Нуфузли халқаро мусобақаларда шоҳсупанинг юқори поғоналарини забт этиб, ҳеч кимдан кам бўлмаган миллат фарзанди эканини исботлаётган спортчилар шижоати дилга ажиб сурур, ифтихор бағишлайди. Истиқлол шарофати билан қисқа даврда болалар спорти соҳасида туб ўзгариш ва янгиланишлар рўй бердики, бунинг самарасини умидли спортчиларимиз ҳамда уларнинг муваффақиятлари мисолида яққол кўришимиз мумкин. Бу мамлакатимизда баркамол авлодни тарбиялашдек эзгу ният ила рўёбга чиқарилаётган ишлар спорт соҳасидаги саъй-ҳаракатлар юксак самара бераётганини тасдиқлайди.