“Бўлар бола бошидан...”

“Умидли спортчилар” танловига

Сурхондарё азалдан полвонлар юрти. Кураги ерга тегмаган, нафсидан номуси устун алплар ва баҳодирларни вояга етказган манзил. Демакки, бугун ҳам уларнинг авлодлари майдонда боболардан мерос ориятни кўксида тутиб, қудрати-ю ақл-заковатини намоён этмоқда.

Куни кеча "Қумқўрғон" темир йўл вокзалида қизириқлик ана шундай бир гуруҳ спортчи болаларни ота-оналари ва яқинлари юксак қувонч билан кутиб олдилар.

Қозоғистон Республикасининг Чимкент шаҳрида спортнинг кунг-фу тури бўйича Қозоғистон Республикаси очиқ чемпионатида 7 нафар ёш спортчиларимиз ғолиблик шоҳсупасидан жой олди.

23 кг. вазндаги спортчилар ўртасида Қодирбек Бойтўраев, 28 кг. вазнда Наврўзбек Чориев, 30 кг. вазнда Шоҳруҳ Бердиев, 40 кг. вазнда Марадонна Поёнов, 60 кг. вазнда Асқарбек Сатторовлар 1-ўринни эгаллаган бўлса, Жавоҳир Қобилов ва Улуғбек Аллаёровлар шоҳсупанинг 2-поғанасидан жой олди.

– Бу муваффақиятларимиз мамлакатимизда болалар спортини ривожлантиришга қаратилаётган эътибор, яратилаётган шарт-шароитларнинг маҳсулидир, – дейди спорт мураббийси Анвар Мирзаев. – Мазкур спорт тури билан Қизириқ туманида 200 нафардан зиёд ёшлар шуғулланади.

Чемпионатда иштирок этган спортчи ёшларимиз ҳар қандай спортчига муносиб, кучли рақиб бўла олишларининг исботи сифатида жорий йилнинг 17-25 июль кунлари Хитойнинг Пекин шаҳрида бўлиб ўтиши режалаштирилган кунг-фу бўйича жаҳон чемпионатига йўлланмани қўлга киритди. Ишонамизки, олдинда турган ушбу нуфузли мусобақаларда ҳам юртимиз эртаси – спортчи ёшлар ғолибликни қўлга киритиб, Ўзбекистон байроғини баланд кўтарадилар.