Билимга иштиёқманд ўқувчилар

таълим муассасаси мавқеини оширади

Ўқитувчилик шарафли, шу билан бирга машаққатли касб. Болаларга дарс бериш жараёнида ўқитувчи доимо ўз устида ишлаши лозим. Бу эса шубҳасиз унинг маҳоратини доимо сайқалланиб боришига ёрдам беради. Ўқувчиларининг камолга етганини кўриш, меҳнатлари самарасини ҳис қилиш устознинг энг катта қувончидир.

Шукр, ана шундай шарафли касбда фаолият юритаман. Самарқанд вилояти Оқдарё тумани Лоиш шаҳарчасида жойлашган 45-ихтисослаштирилган умумтаълим мактабида мусиқа фанидан дарс бераман. Бевосита келажак сари қўйилган муваффақиятли одимларнинг, жумладан таълим соҳасидаги истиқболли ислоҳотларнинг гувоҳига айланаман. Аҳил жамоадан ташкил топган ўқитувчиларимиз бугунги кунда 13 минг 25 нафардан ортиқ ўқувчига дарс бермоқда. Ижтимоий ва табиий фанларга ихтисослаштирилган таълим муассасамиз шу кунга қадар кўплаб ютуқларни қўлга киритган.

Ўқув даргоҳимизнинг бугунги кунда юртимизнинг намунали мактаблари қаторидан жой олиши, чекка бир туманда жойлашганига қарамай, ўз ўрнини топгани касбимга бўлган фахр ҳиссини оширади. Мактабимиз ўқитувчилари орасида “Халқ таълими аълочиси” кўкрак нишони совриндорлари ҳам талайгина. Хусусан, биология фани ўқитувчилари Соҳида Юсупова, Дилрабо Шомуродова, Доллиой Холдорова, кимё фани ўқитувчиси Инобат Тоғаева, математика ва информатика фани ўқитувчиси Дилором Мамашарипова сингари устозларимиз барча учун ўрнак бўлишмоқда.

Дилором Мамашарипованинг 2014 йил “Шуҳрат” медали билан, Винера Мусаввированинг “Дўстлик” ордени билан тақдирланиши муассасамиз мавқеини ҳам жамоамизнинг эртанги кунга бўлган ишончини ҳам оширди.

Ана шундай эътироф ва эътиборга ўқувчиларимиз ҳам муносиб жавоб қайтаришмоқда. Жумладан, ўқувчиларимиздан Фотима Ғофурова 2013 йили бўлиб ўтган “Билимлар беллашуви” кўрик-танловининг республика босқичида биология фанидан фахрли 2-ўринни қўлга киритди. 1-синф ўқувчиси Алина Бўлакова эса 2015 йил бадиий гимнастика бўйича ўтказилган Ўзбекистон чемпионатида ғолибликни қўлга киритди. Айнан шу йили мамлакатимиз миқёсида тоғ спорти бўйича ўтказилган мусобақада Дилафрўз Муҳаммадиева ҳам 1-ўринни эгаллади. 5-синф ўқувчиси Зебо Абдусаматова таеквондо бўйича Ўзбекистон чемпионатида 3-ўринни, Санжар Раҳимов юнон-рум кураши бўйича Ўзбекистон чемпионатида 2-ўринни эгаллагани таълим муассасамизда болаларнинг спорт билан шуғулланишлари учун ҳам алоҳида шароит яратилганининг исботидир. Қизларимизнинг жамоат ишларида фаолликлари ҳам таҳсинга сазовор. Сарвиноз Исомиддинова Ўзбекистон Хотин-қизлар қўмитаси томонидан ўтказилган “Ораста қизлар” кўрик-танловининг республика босқичида “Энг изланувчан ораста қиз” номинациясида ғолибликни қўлга киритди.

Биргина бу эмас, Мадина Қаноатова 2015 йил март ойида Санкт – Петербург шаҳрида, декабрь ойида эса Ригада бўлиб ўтган “Мега юлдузлар танлови”да миллий рақсларимизни ижро этиб гран-при соҳибига айланди.

Таъкидлаш жоизки, қўлга киритаётган бу ютуқларимизда биз ва ўқувчи-ёшларга яратиб берилган шарт-шароитлар ҳам муҳим ўрин тутмоқда. Мактабимиз замонавий анжомлар, ўқув қуроллари билан жиҳозланган. Эришилган муваффақиятлар биз ўқитувчиларга ўз устимизда ишлаш масъулиятини ҳам юкламоқда.