БИЛИМ ва бахтиёрлик манзили

1992-йил 11-февральдаги Вазирлар Маҳкамасининг 60-сонли қарорига асосан мустақил маъмурий ҳудуд сифатида Олмазор тумани таркибида “Ёшлик” талабалар шаҳарчаси ташкил топди. Ушбу ҳудуднинг майдони 600 гектардан кўпроқ бўлиб, шаҳарчада республикамиздаги энг нуфузли Мирзо Улуғбек номидаги Ўзбекистон Миллий университети, Абу Райҳон Беруний номидаги Тошкент Давлат Техника университети, Тошкент Тиббиёт академияси, Турин Политехника университети ҳамда Маданият, Хизмат кўрсатиш ва сервис, Олмазор политехника, Тиббиёт коллежлари, Глиер номидаги Республика махсус мусиқа мактаби ва юқорида номлари саналган ўқув юртларининг академик лицейлари жойлашган.

Юқорида санаб ўтилган ўқув муассасаларида таҳсил олиш учун юртимизнинг турли ҳудудларидан талаба-ёшлар келмоқда. Шаҳарча, аввало, уларни бир жойга жамлаб, дўст тутунишга ёрдам беради. Қолаверса, истиқлол имкониятларидан унумли фойдаланган ҳолда, жамият тараққиётига ўз ҳиссасини қўшишни истаган ёшларга соғлом муҳит яратиш зарур. Негаки, барқарор муҳит ўрнатилган жойда теъран фикрли авлод шаклланади. “Ёшлик” талабалар шаҳарчаси ёшларни бир оиладек яшашга, ҳамфикрликда иш кўришга, энг муҳими ўтмишдан сабоқ олиб, келажакка интилишга, юксак муваффақиятларга эришишга замин ҳозирлаётир.

Ҳозирда шаҳарча ҳудудидаги 9 та маҳаллада 42 мингга яқин фуқаро истиқомат қилади. У ерда яшовчиларнинг деярли барчаси профессор-ўқитувчилар ҳамда малакали шифокорлардир. Талабалар ва таълим муассасаси ўқитувчилари ҳашар йўли билан ўзлари истиқомат қилаётган, таълим олаётган даргоҳларнинг атрофини чаманзорга айлантирди. 16 минг тупдан зиёд игна баргли дарахтлар, 8 мингга яқин мевали дарахтлар, 7 мингдан зиёд манзарали дарахтлар ҳамда 250 минг тупдан ортиқ гул кўчатлари экилди. Шаҳарчани сайр қилар экансиз, ҳавасингиз ортади, талаба бўлиб шу даргоҳларда ўқигингиз, яшагингиз келади. Атрофнинг манзарасидан дил яйрайди. Табиат қўйнида, майин майса устида, дарахтга суянганча китоб ўқиш кимга ҳузур бағишламайди?! Анвойи гуллар ифоридан баҳра олиб, дарс тайёрлаш нафақат саломатликка, балки, ақлан теъран бўлишга ҳам кони фойда.

Соғлом авлод – соғлом жамият демакдир

Юртбошимиз раҳнамолигида амалга оширилаётган ислоҳотлар замирида айнан жамиятга етук малакали кадрлар тайёрлаш ва провардида ёшларга соғлом муҳит яратишдек эзгу мақсадлар мужассам. Биргина талабалар шаҳарчасида яратилган шарт-шароитлар бунга ёрқин мисол бўла олади. Шаҳарчада 38 та талабалар турар жойи барпо этилган. Бу ҳақида “Ёшлик” талабалар шаҳарчаси ҳоким ўринбосари, иқтисод фанлари номзоди Самуғжон Ҳикматов қуйидагиларни сўзлаб берди:

– Бундан йигирма уч йил аввал талабалар турар жойи (илгари ётоқхона дейилган) таъмир талаб эди. Ювиниш хонаси ва ошхона ёнма-ён жойлашгани сабаб турли ёқимсиз ҳидлар димоққа ўрнашиб қоларди. Деворлар нураган, қувурлар ёрилган, иссиқлик батареялари етарли даражада иситмасди. Бир хонага саккиз нафар талабагача жойлаштирилган. Уларнинг еб-ичиши, яшаш шароити бошқаларни қизиқтирмаган.

2005-йил 28-декабрьида Юртбошимиз “Ёшлик” талабалар шаҳарчасига ташриф буюрди. Шаҳарчадаги қурилиш ишлари, талабаларнинг яшаш шароитлари билан танишиб, уларга яна қулайлик яратиш мақсадида бир қанча таклиф ва тавсиялар берди.Тез орада қайта таъмирлаш ишлари якунланиб, мазкур тураржойлар замонавий жиҳозлар билан таъминланди.

Ҳар битта хонага икки нафар талаба истиқомат қилиши белгилаб қўйилди. Хоналарда майин гиламлар, юмшоқ ўриндиқлар, токчаларда хона гуллари, деразаларда жалюзилар ўрнатилган. Кир ювиш машиналари, замонавий газ плиталари, кийим дазмоллаш хонаси ва компютер хоналари талабалар ихтиёрига топширилган.

“Ёшлик” талабалар шаҳарчасининг ҳудудида талабаларга хизмат кўрсатувчи деҳқон бозори, савдо ва маиший хизмат кўрсатиш шохобчалари, умумий овқатланиш ошхоналарининг фаолияти янада кенгроқ йўлга қўйилди. Ёшларнинг бўш вақтларини мазмунли ва унумли ўтказиш мақсадида шаҳарчада спорт иншоотлари – 14 та футбол майдони, 3 та ёпиқ сув мажмуаси, 12 та спорт бўлмаси, 32 та волейбол майдончаси, 26 та баскетбол майдони, 2 та теннис кортлари барпо этилган. Қолаверса, ҳудуддаги Маънавият ва Маърифат марказида бир қанча тўгараклар қатори талабалар чет тилларини ўрганиши учун бепул ўқув курслари йўлга қўйилган.

Дарвоқе, шаҳарчадаги 32-сонли поликлиника 2004-йилдан Талабалар поликлиникаси деб юритилади. Марказ зарурий жиҳозлар билан таъминланган, ҳар ой талабалар махсус кўрикдан ўтказилади. Шифокорлар талабалар турар жойидаги гигиеник тозаликни назорат қилиб боради. Поликлиника талабалар учун бепул хизмат кўрсатади.

Шаҳарчани сайр қилган киши унинг ҳақиқий ёшлик масканига айланганига ишонч ҳосил қилади. Мустақиллик байрамини муносиб нишонлаш мақсадида ҳар бир таълим муассасасидаги каби “Ёшлик” талабалар шаҳарчасида ҳам шодиёнага тараддуд бошлаб юборилган. Атрофга ранг-баранг байроқлар илинган, ҳудудда ободонлик ишлари ниҳоялаб қолган, теваракда, одамлар юзида байрам шукуҳи сезилиб турибди. Шаҳарчага бир бора келсангиз юқорида айтганларимизнинг гувоҳи бўласиз.